Serranê 90î de xeylê cînayetê ke kerdoxê înan dîyar nîyo, qewimîyabî. Yeno vatiş ke heta nika pêro pîya 17 hezar merdimî bi no hawa ameyî qetilkerdiş. Teberê nînan de bi hezaran dewî ameyî veşnayîş û xeylê kesî raştê neheqî û îşkenceyan ameyî.
Bajarê ke tede neheqî û qetilkerdişê merdiman bîyo, înan ra yewe zî Êlih o. Babete ser o cinîyî qisey kerdî.
Kamîle Şîmşeka ke serra 94 de dewa înan hetê dewlete ra ameybî veşnayîş, qisey kerde û wina va: “No proses de birayê mi Alî Uguro ke waştêne şêro Kercews, hetê hêzê dewlete ra ame remnayîş. Ma ancax 45 rojan ra dima musayî ke birayê mi ameyo qetilkerdiş. Televîzyon de qetilbîyayîşê birayê mi sey ke terorîst ameyo kiştiş, ame nîşandayîş. Reyna o wext 2 warezayê mi hetê Hîzbullahî ra ameybî qetilkerdiş. Ma qey hende zulmo ke dewlete vera ma kurdan de kerde bes nîyo? Her roje şer hîna gird beno. Wextê Tansu Çîllere de çîyo ke destê înan ra ame, kerdî. Tansu Çîllere şîye, ewro herinda aye de Tayyîp Erdogan ameyo. Erdogan zî eynî çîyan keno.”
Mergî zêde bîyî
Sultan Aboyîya 58 serreyî va ‘badê ke dewa ma ameye veşnayîş, ma mecbûr mendî ke koçê Êlihî bikerî’ û wina dewam kerde: “Ma bi kişîyayîşê zamayê ma cînayetê ke kerdoxê înan dîyar nîyî, şinasna. O wextî xeylê zulm bi ma ame kerdiş. Ti cîyayîya o wextî ewro ra çin a. O wext bi hawayo nimite merdimî ameyênê qetilkerdiş, ewro bi hawayo aşkere yenî qetilkerdiş û ti kes zî nîno mehkemekerdiş. Vizer ra nata çi bedilîyayo?”
Seba kurdan çîyêk nêbedilîya
Muhlîse Kinaya 54 serreyî zî wina va: “Seba ke ma qoricîtî qebul nêkerd, dewa ma 25 serrî verê ameybî veşnayîş û ma mecbûr mendbî ke koçê Êlihî bikerî. Keyeyê ma de ti kesî qoricîtî qebul nêkerd. Ma heme mal û milkê xo ca verda û ma kewtî rayîr. Badê ke ma tîya de bica bîyî zî dewlete fek ma ra veranêdaye. Ma ewro zî eynî çîyan cuyenî; verê qatilî nêameyênê zanayîş, labelê ewro bi hawayo aşkere yenî kerdiş. Seba kurdan çîyêk nêbedilîyeno.”
OZGUR AYDIN / ANF / ÊLIH