Şarê êzidî yê ke bi desan ferman, hêriş û qirkerdişî reyde rî bi rî mendê û reyna zî koyê Şengalî nêteriknayî. Nika zî her çiqas ke tayê dew û beldeyê şengalijan destê çeteyanê DAIŞî de bibî zî şarê êzidîyî agêrenê keyeyê xo û herêma xo newe ra şên kenî.
Şaredarîya Şengalî ke hêrişanê çeteyan ra dima seba newe ra awankerdişê Şengalî dest bi xebatan kerdbî, heta nika xeylê problemê şarê êzidîye çareser kerdo. Babet ser o de Endamê Îdareyê Şaredarîya Şengalî Cindo Emer Silêman, Endamê Îdareyê Şaredarîya Şengalî Şêx Cema û keso bi nameyê Dexir Minteqanêyî qisey kerdî.
Hedef xîzmet o
Cindo Emer Silêmanî va ‘hedefê ma yê yewine xizmet o’ û wina va: “Bi taybetî zî şarê ma yê ke koyê Şengalî de mehsur mendê, înan rê xizmet o. Qasê 25 endamê ma estê û heme zî bi hawayêko zerrîwaştox xebetîyenê. Erzaq yenê vilakerdiş û problemê înan yenî goşdarîkerdiş. Heta nika 11 bîrê awe ameyê kinitiş û 3 jeneratorî Xanasorî rê ameyê dayîş. Nê jeneratorî 100 ra 85 keyeyan rê cereyan resnenî. Ma eşkenê vajî ke heme problemê cereyan û awe ameyê çareserkerdiş.”
Hadreyînê zimistanî
Şêx Cemayî zî wina va: “Wesayîtê ke destê ma de yê heme zî destê çeteyan ra ameyê girewtiş û kehen î. Hukmatê Îraqî hetkarîye nêdana ma. Ma wazenê ke dewa Milikanî ke wextê Seddamî de ameybî vengkerdiş, wa newe ra bêra awankerdiş. Çend rojî ke ma rayîrê na dewe virazenê. Dima ra zî ma do awe û cereyanê na dewe bivirazî. Nika ma amadekarîyê zimistanî kenê. Heta ke destê ma ra bêro ma do bixebetyî.”
Tewr peynî Dexir Minteqanêyîyo ke tanker ser de xebetîyeno zî qisey kerd û va: “Ez awankerdişê şaredarîye ra nata tîya de xebetîyena. Nika ez şarî rê awe vila kena. Seba vilakerdişê awe ma sibayî saet 6 de dest bi xebate kenî û heta 7, 8, 9ê şewe zî ma xebetîyenî. Tena 5 tanqê ma yê awe estî. 3 hebî hetê Xanesor û Sinune de xebetîyenê. 2 hebî zî sewbîna cayan de yenê xebetnayîş. La reyna zî problemê awe heme bi temamî nêameyo çareserkerdiş.”
RIZGAR DENÎZ / DELÎLA DÎLAN/ ŞENGAL - ROJNEWS