Wekîla Hemserekîye ya grûba HDPyî û parlamentere Meral Daniş Beştaşa ke seba weçînayîşê 24ê Hezîrane Sêrt ra namzed ameye nawitiş, qisey kerde û sîstemê ‘Hemserekkomarî’ sero melumatî dayî.
Beştaşe daye zanayîş ke Tirkîya û Kurdistan de şertê faşîzmî yenê cuyayîş û tewr zêde cinîyî zulm vînenê û bi şîdet, hêrişê zayendî û îstîsmarî reyde têrî manenî.
Beştaşe va ‘tedayê ke vera cinîyan de estî, roje bi roje zêde benê û vatişê îqtîdarî rasterast komelî ser o tesîr kenî û wina va: “Wexto ke îdarekarî dezgeyanê fermîyan de de vajê ‘cinî û camêrdî sey yewbînanî nîyê’ o wext do camêrdî her ca de eynî çîyan vajî. Îradeya cinîyan sindoqan de zaf muhîm a. No weçînayîş mabênê demokrasî û faşîzmî de do tercîhêk bêro kerdiş. Cinîyî şertê faşîzmî de nê, şertê demokrasî de eşkenî biresî azadîya xo.”
‘Çira do teslîmê yew mêrdimî bêro kerdiş?’
Beştaşe va ‘HDP partîya cinîyan o’ û qiseykerdişê xo wina qedênaye: “Ma vilaweka xo de qala heme hetan kerdo. Senî ke hemserekî û hemşaredarî estê, çira serekkomarîye do yew mêrdimî rê bêro verdayîş? No het de zî eşkeno ‘sîstemê hemserekî’ bibo. No weçînayîş eynî wext de weçînayîşê rizgarbîyayîşî yo. Ganî cinîyî heta 24ê Hezîrane fek heme karê xo ra vera bidî û seba weçînayîşî bixebityî.”
SÊRT