Walîyê Şirnexî verîya nika aşkere kerd ke  ‘iyê dê Şirnexêko modern awan bikerî.’ Şirnexijan cewab day nê vatenan û persa  ‘madem şima dê awan bikerdênê, o wext şima çira rijnayî’ kerdî. 

Bajarê Şirnex de qedexeyê tebervejîyayîşî 246 rojan dom kerdîbî û dima ra zî dewlete seba bêmerdim kerdişî Şirnex bi temamî rijnaybî. 246 rojan ra dima qedexe hetê dewlete ra amey wedarnayîş û welatîyî agêrayî Şirnex. La keyeyo ke welatîyî xo tede bistirnî, nêmendbî û heme ameybî rijnayîş. Wêneyê Şirnex de ameybî antiş, nê wêneyan de zî asayêne ke kerra ser kerra de nêmendbî. Her çiqas ke Walîtîya Şirnexî îzeh kerdbî ke pêro pîya 2 hezar awanîyî ameyî rijnayîş zî ame dîyayîş ke hûmara awanîyê ke ameyî rijnayîş hîna zêde ya.

Welatîyê ke Taxa Bahçelîevlerî de manenî, seba ke keyeyanê xo newe ra awan bikerî, dest pê xebate kerdî. Welatîyî seba viraştişê keyeyanê xo bi hawayo komunal xebetîyênî û piştî danî yewbînan. Welatîyî dîyar kenî ke Walîtîye sey ke mizgînî bidera, vana ‘Ma do Şirnexêk modern awan bikerî, la madem walîtîye do biviraştêne, o wext çira keyeyanê ma rijnayî?’

Babete ser o welatîyî qisey kerdî. 


Wexto ke cîranê mi nêbî, ez keye se kena?

Welatîyan ra Behîye Gelmeze qiseykerdişê xo de va ‘êdî çîyo ke ma vajî nêmendo’ û qiseykerdişê xo wina domna: “Ma keyeyê ke hetê walîtîye ra bêrî viraştiş, nêwazenî. Her çiqas ke derheqê tayê keyeyan de qerarê rijnayîşî çin o, reyna zî nê keyeyî daxî yenî rijnayîş. Nê semedî ra ti manaya vateyê ‘Bajaro newe’ çin o. Rijnayîş keyeyê ma de çin o, la belê wexto ke cîranê mi nêbîy, ez keye se kena?”

Badê keyeyan birijnî gelo keyeyanê neweyan do bivirazî?

Welatîyan ra Behîye Ertaşe zî badê ke agêraya keyeyê xo û halê keyeyê xo dîya, şok bîya. Behîye Ertaşe va ‘keyeyê mi bi aşman hetê polîsan ra bi hawayo qerargeh ame xebetnayîş’ û qiseykerdişê xo rê wina dewam kerd: “Heme kelmelê mi ameyî taxrîbkerdiş. Polîsî her tim ma rê pêşnîyazê ‘şêrê Îraq’ kerdêne. Ma yew parçe erdê xo bi heme mal û milkê dewlete nêbedilnenî. Ma nê erdan de ameyî dinya û tîya de pîl bîyî. Heta nika heme keyeyanê ma rijnayî, do nika ra pey ma rê keye bivirazî? Ma êdî bawerîya xo bi înan nêanî.”


‘Ma do newe ra awan bikerî’

Behîye Ertaşe dewamê qiseykerdişê xo de bale ante ser newe ra awankerdişê keyeyan û qiseykerdişê xo wina qedêna: “Ma do keyeyanê xo newe ra awan bikerî. Ma senî ke 20 serrî xebetîyaybî, ma do reyna 20 serrî bixebetyî û keyeyanê xo newe ra awan bikerî. Tena wa ma ra dûrî bivinderî. Nê qoricîyî zî hetê hêzanê dewlete de beşdarê rijnayîşî benî û no zî merdimî hîna zaf dejneno.”   

DÎHABER/ŞIRNEX