Mamosta Kadrî Kaya ke demêko derg xebatanê çapemenîya azade mîyan de ca girewt û tedawîya nêweşîya rîşa merdimwere dîyêne, wefat kerd. Cenazeya Mamosta Kadrî Kayayî Goristanê Yenîkoyî yê Amedî de bi merasîmêk ameye definkerdene. Merasîme de rojnameger Tayîp Temelî qisey kerd û va ‘cuya Mamostayî seba ma nimuneya’ û da zanayene ke cuya ey do înan rê bibo rayber.
Kaya demêko derg rojnameyê Azadiya Welatî de xebetîya û Temsîlkarîya Amedî ya rojnameyê Ozgur Gundemî kerd. Reyna nizdîyê 13 serran Temsîlkarîya Amedî ya Ajansê Xeberan yê Dîcle (DÎHA) kerd. Mamosta nizdîyê serrêk bi ke Unîversîteya Ege de tedawî dîyêne.
Kaya 15ê nîsana 2011î de Êlih de netîceyê operasyonêkî de amebi tepiştene û dima ra tewqîf bibi. Kaya dima ra tehlîye bibi, labelê derheqê ci de doze amebî akerdene û heta 15 serran cezaya zîndanî ameyêne waştene. Labelê netîceyê doze de 2 serrî 1 aşme cezaya zîndanî dîyaye ci. Kaya Zîndanê Êlihî de 1 serre 7 aşmî mendbi.
MA / AMED