Şexsê cinîyê Rojawan û Sûrîyeyî de her hetê komelî ra her roje hîkayeyê xoverdayîşî yê cîyayî yenî dîyayîş. Nînan ra yewe zî cinîya bi nameyê Leyla Ehmeda reqqayije ke vana ‘Ganî cinîyî cuyayîşêka erjane qebul nêkerî, kamcîn babete de wazenî wa xo aver bîşêrî’ ya.Leylaya ke serra 1976an de ameya dinya, 14 serreyîya xo de yena zewejnayîş. Labelê Leyla nêwazena biba cinîya keyeyî, Leyla teber ra wendişê xo domnena, unîversîte qedênena û bena mamosta. Şorişê Rojawanî ra dima Leyla beşdarê perwerdeyê kurdî bena.
Mamosta roşnî ya
Leylaye va ‘ez, mêrdeyê mi, 2 kênayê mi û zamayê mi ma pêro pîya 5 kesî beşdarê perwerdeyê kurdî bîyî’ û wina domnaye: “Eke ma her yewe şêrî dewêk, o wext 5 dewî roşn benî. Ma bi zîhnîyetê her dewêk rê mamostayêk hereket kerd. Ez verê cû karê hêgayan de xebetîyaya, la mi bawer kerd ke ez eşkena sewbîna çîyan zî bikera. Yê ke mi ra vatî ‘ti zewejîyaye ya û 4 domanê to estî’ zî qerardarîya mi dîyî.”
Cinî eşkenî bikerî
Leylaye dewamê qiseykerdişê xo de va ‘ez tayê şewan de bi kîtab rakewtêne’ û qiseykerdişê xo wina qedênaye: “Cok ra ez vana ke kamcîn cinî bena wa bibo, eşkena xo aver bîşêra. Ganî cinîyî cuyeyêka ercane qebul nêkerî û ganî cinîyî xo ver de sînoran nêronî. Vernîya cinîyan abîyo û ganî cinîyî sazîyan de cayê xo bigirî.”
ŞÛJIN / KOBANÊ