Li Franseyê, CDK-F û TJK-F bi alîkariya hevpar maske û xwarin gihandin nexweşxane, şaredarî û saziyên alîkariyê. Hedef 100 hezar maske ne. Ji bo alîkariya kampanyayê sazî li benda destekê ne. BARIŞ BALSEÇER Ji ber şewba koronayê li Franseyê ji 17ʼê Adarê ve derketina derve bi sînor e. 11ʼê Gulanê wê plan qonax bi qonax sînor bêne rakirin û sistkirin. Li dijî şewbê herî zêde xebatkarên tendirustiyê û saziyên alîkariyê têkoşiyan. Li gelek welatên Ewrûpayê Kurd û kurdistanî hatin cem hev, xwe bi rêxistin kirin tevî saziyên Kurdan kampanya dan destpêkirin û bi vî awayî destek dan xebatkarên tenduristiyê û alîkariya muhtacan kirin. Tevgera Jinê ya Kurd li Franseyê TJK-F û Konseya Civaka Demokratîk a Kurd li Franseyê CDK-F yek ji van kampanyayên qalkirî 9ʼê Nîsanê da destpêkirin. Di çarçoveya vê kampanyayê de Komîteya Krîzê ya Hevpar maskeyên hatin çêkirin û xwarinên bi alîkariya esnafên Kurd hatin amadekirin, gihandin xebatkarên tenduristiyê û kesên muhtac. Hevserokê CDK-F Loqman Kanar der barê kampanyayê de agahî dan rojnameya me û da zanîn ku di gava pêşî de 3500 maske çêkirine û 300 maske jî dane şaredariya Champigny Sur Marneyê. Li ser vê jî DKTM li herêma Marnê soz daye qumaş bide bi qasî 7000 hezar maske bêne çêkirin. Ji niha ve ji bo çêkirina 2000 maskeyî qumaş wergirtine. Loqman dîsa da zanîn ku wan 300 maske dane nexweşxaneya Groupe Hospitalier Paul Guiraudê û xwarina esnafên Kurd ji bo 100 kesî amade kiriye dane nexweşxaneyê. Alîkarî ji bo muhtacên li bajarê Villeneuve Saint Georges jî hat kirin û gelek maske li welatiyan jî hatin belavkirin. Loqmên diyar kir ku armanca wan çêkirina 100 hezar maskeyî ye. Maske jî ji aliyê jinên Kurd ên li Paris, Villiers le bel û Drancy ve têne çêkirin. Li Bordeauxê jî jin maskeyan didirûn. Berdevka TJK-Fʼê Sevgî Elmas a di heman demê de endama Komîreya Krîzê ye, anî ziman ku wan li tevahiya welêt koordînasyon saz kirine. Elmasê diyar kir ku ew kampanya malbatên xwişk û bira jî didomînin. Kesên bixwazin alîkariya kampanya çêkirina 100 hezar maskeyî ya TJK-F û CDK-F bibin dikarin bi adresa li jêr têikiliyê deynin: https://www.kisskissbankbank.com/fr/projects/100000-masques-pour-le-personnel-soignant