Holdîngê Koza Îpekî rê 5 qayûmî ameybî tayînkerdiş, heta nika nînan ra 4 qayûmî karî ra ameyî girewtiş. Qayumê ke ameybî tayînkerdiş dayî yewbînan ro û mabênê înan de lej vejîya. Sebebê lejê qayûman dolar û TL yo.
Seba dolaran
Goreyê zanayîşan qayûm Hîkmet Keleşî 26ê êlule de kombîyayîşê heyetê qayûmî de fikrêk eşto orte û seba ke fikrê ci hetê heyetê qayûmî ra nêameyo qebulkerdiş, mabênê înan de lej vejîyayo. Goreyê îdîayan Hîkmet Keleşî kombîyayîş de qayûman rê teklîfê ‘Ma 250 mîlyon dolar pereyê holdîngî biaçarnî TL’ kerdo, la teklîfê Keleşî hetê heyetî ra nêameyo qebulkerdiş, dima ra zî mabênê înan de lej vejîyayo. Rojnameyê Hurrîyetî ra goreyê xebera Fevzî Kizilkoyunî, wexto ke Keleş qerekol de bîyo, qayûmo ke Holdîngê Koza Îpekî de ca girewtêne têkilîya xo bi Hîkmet Keleşî reyde birnayo.TMSFyî 4 qayûmê ke bi nameyê Mustafa Akçil, Arîf Yalçin, Hayrullah Dagistan û Hikmet Keleşî karî ra eşto û tena qayûm Hamza Yanikî sey qayûm verdayo.
NAVENDÊ XEBERAN