Tirkîya no dem de, tam qaos ra vêrena. Meclîs û Hukmatê Tirkîya bi temam bêîrade mendê. Vera HDP heme partîyê pergalî bîyê yew. Tu îradeyê Meclîsê Tirkîya nêmendo. Bê îstîsnayan wekîlê Meclîsê Tirkîya bi zafane teslîmê polîtîkaya înkar û îmhayî bîyê. Serekê CHP Kemal Kiliçdaroglû ra-ray birreno. Vejîya orte ke ê ey zî birrayîşo veng o.
Hinê qalan de mendo
Wexto ke mesele HDP bo, mesele kurd bo, ferqê ey û Dewlet Bahçelî, Ahmet Davutoglu, Bînali Yildirim û Serekkomar Tayyîp Erdoganî çin o. No zîhnîyet; zîhnîyetê îmha û înkarî yo. Eyro ma hewnênê ke, kontr-gerrîlla, Ergenekon, JÎTEM, Tîma Xencerî, Tîma Esedûllahî , MHP, mafya, reng û nameyê înan çi beno wa bibo, înan û AKP; vera kurdan û HDP pêkerdo. Tirkîya de demokrasî-memokrasî hinê qalan de mendo.
AKP û Serekkomar Erdogan, seba menfeetê xo yê sîyasî û rantê ekonomîyî; dînê îslamî û nîjadperestey şuxulnenê. Xo se temsîlkarê dînê îslamî hesibnenê. Hetta kurdan bêdîn zî îlan kenê. Xora DAIŞ zî kurdî bêdîn îlan kerdê. Şima rê çi lazim o ke kurdî înan kenê, yan nêkenê? Şima efendîyê kurdan ê?
Yew vateyê verînan esto, vanê ke; “Merdimo ke nengan dînê mi çîneno, gelo o bi xo musluman o?.” Wexto ke kurdî; behsê heq û huqûqê xo yê neteweyî kenê, wexto ke behsê heqanê xo yê demokratîkan kenê, vanê ke; “Şima barkerdoxey (bolucey) û nîjadperestey kenê. Îslamîyet de, nîjadperestey çin a. Îslam de pergalê umete esas girîno.”
Tirkîyey ser o awan kerdo
La têgeyrê înan û muslamaney, yewbînan nêtewşeno. Ewta de resmen diriyey kenê. Wexto ke kurd heqanê xo biwazo, terorîst beno, barkerdox beno, bêdîn beno. La înan bi temam pergalê xo tirkîyey (tirkîtey) ser o awan kerdo. Wardenê-roşenê wesfanê tirkîyey (tirkitey) danê. Raşt a, heme kes zano ke, dînê îslamî de nîjadperestey çin a. Mesela qanûnanê şima de tek yew qala kurdî nêvirena. Kam nîjadperest o bellî yo.
Kulturê ma de, nê hîrê çîy nêynê qebulkerdiş. Xora dînê îslamî zî nê hîrê çîyan qebul nêkeno. A yewine, qetlkerdişê merdiman o. A dîyin zurkerey a. A hîrêyin dizdey a. Dînê îslamî de qetilkerdişê merdiman gune yo. Ma qetlîamanê bînan caverdê, înan hima hesabê Qetlîamê Roboskî nêdawo. Dînê Îslamî de zurkerey çin a.
Xora bellî bi ke, no qetlîamê Gara Enqere DAIŞî kerdo
La çi heyf ke înan de zurkerey zî esta. Mesela vatnê ke; “Qetlîamê Enqere, qatlîamêko komplîke yo. No qetlîam; PKK, YPG, Mûxabaratê Sûrîye û DAIŞî pîya kerdo. “ La heme kes zano ke, no qetlîam DAIŞî kerdo. Xora Mehkema de zî bellî bi ke, no qetlîamê Gara Enqere DAIŞî kerdo. Yewna het ra bi operasyonê 17 Kanûna 2013yî de, kamî kutu-kutu, tomar-tomar pereyî tirawitî (diznayê) bellî yo.
Goreyê mi nê vatişê raşt î, şik û gûman nê vatişan de çin o. Eke nê vatişî raşt bî, ganî herinda HDPyan de, kamî ke, qetlîam kerdo, kamî ke dizdey kerda, ganê Meclîsê Tirkîya, vernîya destnêdayîşê înan niakerdnê. Ganî ê biameynê mehkemekerdiş, mewkî û meqamê înan çi beno wa bibo, ganî ê biameynê cezakerdiş.
Yew roj sereyê CHP zî weno
AKP û MHP bîy yew û CHP zî destek da û vernîya destnêdayîşê (destnêpanayîşê) HDPyîyan akerd. No yew derbe yo. Ewta de esameyê demokrasî çin o. Kemal Kiliçdarogluyî vat ke; “Teklîfê AKP yo destnêdayîşî, tersê Qanûnê Bingeyî bibo zî ma eya (e) vanê.” Kiliçdaroglû û CHP no derbeyî rê bîyê destek. No zîhnîyet, yew roj sereyê CHP zî weno.
HDP dima sira yena CHP. No zîhnîyet merdimanê xo zî weno. Mesela rewşa Fethullahîyan raşte de ya. Mesela rewşa Ahmet Davutogluyî û Bulent Arincî û Serekkomarê verê Abdullah Gulî orte de ya. AKP mîyan de siba biletê kamî birêno, bellî nîyo. AKP mîyan de munaqeşeyanê fikran çin o, rexne û xorexne çin o. Zaf vengey (vengîye) û zaf renginey (rengînîye) esla qebul nêveynîna.
Zaf heyf beno
Wazenê ke na partî zî Meclîs ra fîynê. Vejîya orte ke, ne serekkomar Tayyîp Erdogan, ne AKP, MHP û tey wekîlê CHP tehamulê HDP nêkenê. Xora Serekkomar Recep Tayyîp Erdoganî talîmat da, Meclîsê Tirkîya zî no talîmat ard ca. Na rewşe 1994 de rayna bi destekê CHP wekîlê HEPî Meclîsê Tirkîya ra ameybê vistiş û dima zî debîybê zîndan. Ay wext zî no Meclîsî yew xetaya tarîxî kerdbî. Eke na ray zî wina (ina) hewa yew çîy bibo, zaf heyf beno.
Ma na zî baş zanê ke eke rayna na xeta bibo û wekîlê HDP Meclîs ra bêrê vistiş, demokrasîyê Tirkîya vînî keno. Şarê Tirkîya zirar veynenê. Qederê Tirkîya teslîmê yew merdimî nêbeno. Na rewşe, yew sîstemê (pergalê) dîktatorey de bena. La ma na sey nameyê xo zanê ke dîktorî zî yew roj mutlaq hesab danê.
Tehamulê muxlefetî nêkenê
Tirkîya de merdimî ke şer de israr kenê, esla gedanê xo raynêkenê şer. Nê merdimî eke zaf şer ra zaf hes kenê se, wa verî gedanê xo raykê şer. Xemê înan nîyo ke ciwanê xizananê kurdan û tirkan mirenê. Logatê înan de heq, huqûq, edalet çin o. Logatê înan de aşîtî û demokrasî çin o. Nê merdimî, di çîyan dima yê. Ay yewin ranto sîyasî o. Ay dîyin zî ranto ekonomîk o. Nê merdimî polîtîkaya îmha û înkarî ra miqat benê. Eke Tirkîya de demokrasî înşa bibo, no rantê înan birîno. No semed ra tehamulê muxlefetî nêkenê. No semed ra wazenê ke HDPyî Meclîs ra fîynê.
Meseleyê Tirkîya asan çareser benê
Terafê tarîxî ra, terafê merdimanî ra yew roj mutlaq mehkum benê. Semedo ke, Tirkîya qaos ra vejîyo, ganî Tirkîya de demokrasî înşa bibo. Demokrasî zî bi rêxitinbîyayîş û organîzebîyayîşê şaranê Tirkîya înşa beno. Tirkîya de bi mehdîyan, bi yew merdimî, meseleyî çareser nêbenê. Şarê Tirkîya eke biwazê û organîze bibê meseleyê Tirkîya asan çareser benê. Ay wext şer zî vindeno, ciwanî zî zeh nêbenê
HDP na mesele de mîsyonî xo bîyaro ca
AKP mîyan de şef çi vajo, ay çîy beno. Şef se ra se îtaet wazeno. No zîhnîyeto otorîter, zirar dano şaranê Tirkîya ro. Ma waştnê ke Meclîsê Tirkîya meseleya kurdan, Meclîs de çareser biko. Ma waştnê ke HDP na mesele de rol û mîsyonî xo bîyaro ca. HDPyan dizdey nêkerda, yewer qetl nêkerdo. Semedo ke fikrê xo ardo ziwan, semedo ke rexneyê demokratîkî kerdê, mûqtedîrî wazenê ke ceza bidê înan. Meclîs de tena yew partîya mûxalefetî menda.