Reyna dibistan abenî. Reyna tut û domanê kurd yenî qirkerdiş. Qey qirkerdişê kalikê mi Hecî Ehmedî yew qiseykerdibi, qet vîrê mi ra nîşino. Ez 6 serrî bî. Ma dewe de ciwîyenê. Baw û apê mi destê mi girewtibi ez berdênê mekteb de qayît kerdênê. Ucaxî kalikê mê pey keye ma de ver qultenî de bin darê tuyer di runiştibî. Senî ez hina dîya, berma. Vat ke, “Şima tutê mi benî ça? Şima tutê mi benî mektebê Atakutikî? Şima tutê benî kenî tirk, benî kenî kemalîst? Şima çira hina kenî? Mekteb mektebê ma nîyê, yê neyarîyê. Yê dagîrkerîyê. Tutê ma meşirawenê mektebê tirk. Hetanê mektebê ma awannîbenê, tutanê ma meşirawenê mektebê tirkan.”
Kalikê mi hina qisey kerd, se kerd, se nîkerd, reyna baw û apê mi ez berda mektebê dagîrker yê tirkan. Mi tam 17 serrî mektebê dagîrker yê tirkan de wend. Nika ez vana, ax û wax! Werekê mi yew deqîqe zî mektebê tirkan de nîwendênê. Emrêk mi mektebê tirkan de nîvîyertênê.Ez vana, çi ameyo serê kurdan pê rayîra mektebê tirkan û wendişê tirkî ameyo serê kurdan. Tirk, mektebê tirk wendiş sey raverşîyayîş danî dîyarkerdiş. Şarê ma zî vano qey ez tutê xo bişirawî mektebê tirkan, tutê mi raverşîyero. Bibo doktor, endezyar fîlan fîlan..
Raşta tutê kurdan benî, doktor û endezyar. La nîbenî doktor û endezyare kurd. Benî doktor û endezyarê tirk. Benî doktor û endezyare pere. Eger hina nîbenê, wexto ke dewleta dagîrker hêrîşê Amed-Sûr, Farqîn, Cizîre Botan, Nisêbîn û Şirnex de yew doktor mend? Ney. Raştî hinaya. Wexto ke yew hina biewno, yeno dîyayîş ke mektebê dagîrker tutê kurdan qirkenî, kenî tirk. Yane wendişê mektebê tirkan raveyşîyayîş nîya. Modernbîyayîş nîya. Zanyarî zî nîya. Gera herkes nê çîyan bivîno. Goreyê nayî zî yew tutê xo nîşirawo mektebê tirkan. Pêronê mektebê dagîrker yê tirkan boykot bikero. Kam ke tutê xo bişirawo mektebê tirk, mane ke de vano, ha tutê mi şimarî, tutê mi bikerênê tirk.
Yane cîgerê xo teslîme pîsîng keno. Dinyaye de yew dayî û baw hina nîkenî. La dayî û bawê kurd hina kenî. Ma dayî û bawê ke tutê xo şirawenî mektebê tirk, nîzanî tutê danî qirnîkerdiş. Nika qey (seba) vernîye qirkerdiş bêro girewtiş, alternatîf zî virazîyayî. Xora mektebê azad û alternatîf yê kurdî zî abîyê. Wa şarê kurd, tutê xo bişirawo mektebê kurdî. Wa tutê ma bi zonê xo, bi kirdkî û kurmancî perwerde bivînê. Mektebê kurdî, ameyoxê Kurd û Kurdistanîyê.