Tirkîya de her ke şono mergê domanan zêde beno. Îxmalê hukmatî ver her ke şono hîna zêde domanî mirenî. Aladagê Edene de yurdo ke hetê tarîqatê Suleymancîyan ra amebî awankerdiş de şewat virazîya û şewat de 11 doman û yew zî wezîfedar ciwîyayîşê xo vîn kerdbî.
Yurdê tarîqatan ke Amed, Konya û sewbîna cayan de abenî, hawayêko bêkontrol û bêhûquqî abenî. Reya verêne Komeleya Domanê Gundemî ke bi Qerarnameyê Hukmê Qanûnî ameybî padayîş, projeyê domanan viraştêne û waştêne ke projeyanê xo bierzo dewre.
Komeleya ke warê domanan de xebetîyayêne, bi desan reyan problemanê domanan arde rojeve. Weqfa Ensarî ke çend rey bi îstîsmarê domanan ameye rojeve, prosesê OHALî de nêameye padayîş. La Komeleya Domanê Gundemî ke zaf projeyê cîya-cîyayan seba domanan amade kerdibî, hetê hukmatî ra ameye padayîş. Projeyanê Komeleya Domanê Gundemî ra yewe zî ‘pawitişê fîzîkî yê mekteb û yurdan û vernîgirewtişê mergê domanan bî.
Gamekê daxî nêeştî
Serra 2008 de Konya de netîceyê hezaza ke virazîyaye ver tena Kursê Quranî de 17 domanî merdî û 29 domanî zî birîndar bîyî. Amed de serra 2015 de Kursê Quranî de şewat virazîya, 6 domanî merdî û 6 domanî zî birîndar bîyî. Reyna Yurdê Bogazîçî de tengbîyayîşê gazî ver teqayîş virazîya û netîceyê teqayîşî de 17 domanî merdî û 29 domanî zî birîndar bîyî. Reyna 12ê gulane 2016 de domano bi nameyê Efe Bozî Dibistana Dumlupinarî de lawabo ra keweno erd û mireno. Dima ra Mektebê Astengdaran yê Stenbolî de, domano bi nameyê Yunus Eser tepiştişê ceyranî ver mireno. Hende mergî virazîyayî labelê hukmat seba domanan gamêk daxî nêeşt.
DÎHABER / ENQERA