Hemleya Rizgarkerdişê Reqqa roja xo ya 86. De dewam kena. Şerwanî her roje hîna zaf nizdîyê azadîya Reqqa benî.
Hemleya Rizgarkerdişê Reqqa de hedefo sifteyîn yê şerwananê HSDyî rizgarkerdişê sîvîlan o. Cok ra destpêkê hemle ra nata ekîbê taybetî yê ke girêdayeyê HSD yî, ameyî amadekerdiş. Nê ekîbî seba ke sîvîlan rizgar bikerî û biresnî herêmanê biewleyan xo erzenî tehlukeyan mîyan.
Na çarçewa de şerwanî seba ke sîvîlan rizgar bikerî, goreyê planê ke verê cû ameyî amadekerdiş, hereket kenî. Badê ke taxî yenî rizgarkerdiş, mayînê ke hetê çeteyan ra ameyî ronayîş, pak kenî. Şerwanî no het de seba rizgarkerdişê sîvîlan, xo erzenî tehluke mîyan. Hetta şerwanî ge-ge seba nêyî şehîd û birîndar zî benîy.
Hesir çimê înan ra yeno war
Wexto ke sîvîlî mergî ra rizgar benîy, şerwanan verik kenîy û sipasîya xo înan rê kenîy. Wina aseno ke sîvîlî hetê şerwanan ra zaf rehet î. Tayê welatîyî zî wexto ke şerwanan vînenîy, hesir çimê înan ra yeno war. Reqqayijî bi vatişê ‘ma mergî ra ver bi cuyayîşî herikîyenî’hîsê xo anî ziwan.
Şerwanî bi heme îmkananê xo hetkarîya sîvîlan kenîy û awe û werd înan rê vila kenîy. Reyna şerwanî kesanê birîndaran zî seba dermankerdişî wedarnenîy merkezê Heyva Sore ya Kurd. Şerwanêkî HSDyî dîyar kerd ke çeteyê DAIŞî tersan ver, sîvîlan sey qalxanê ganî xebetnenîy.
DILÎŞAN ÎBIŞ/REQA/ANHA