Hemserekîya Konseyê Caardişî yê KCKyî tepiştişê hemserek û parlamenteran de îzehetêk nuştekî daye.
Merhaleyêka neweyî yê hêrişê topyekunî ya
KCKyî îzehetê xo de vato ‘îqtîdarê faşîst yê AKPyî hemserek Fîgen Yuksekdage û Selahattîn Demîrtaş zî tede xeylê parlamenteran tepişto’ û îzehet wina domyayo: “No hêriş merhaleya peyên ya qerarê tepisnayîşê îradeya şarî ke kombîyayîşê MGKyî yê 30ê teşrîna verêne de ameybî girewtiş a. Hêrişê ke 24ê temuza 2015 de dest pêkerdbî, ewro resa merhaleyêka neweyî. Nê tepiştişî hemleya şikitişê îradeya şarî ya. Reyna nê tepiştişî yenî manaya nêşinasnayîşê îradeya şarê kurdî. No qerar nika nê rewna ameyo girewtiş. Pêvînayîşê Erdogan û Bahçelîyo faşîstî de zî babeta tepiştişî ameya qiseykerdiş. Nê pêvînayîşî de Erdogan Bahçelîyî ra destege girewto. AKP û MHP bîyî yew partîye.”
Têkoşînê ortax eşkeno nê hêrişan bivindarno
KCKyî dewamê îzehetê xo de vato ‘Nê tepiştişî serrgêra 14in ya AKPyî de virazîyayî’ û wina ameyo vatiş: “AKP wazeno bi pelçiqnayîşê kurdan yew hegemonyaya neweyî awan bikero. AKP wazeno bibo partîya awanker, Erdogan zî wazeno bibo lîdero awanker û nêyî zî wazenî bi pelçiqnayîşê kurdan bikerî. Nê semedî ra beno ke nê hêrişî zêde bibî. Tena yew rayîrê vindarnayîşê nê hêrişan esto, o zî têkoşînê ortax yê şarê kurdî û hêzanê demokrasîye yê bînan o. Nê hêrişî yew merkezî ra yenî meşnayîş. Heme çapemenîye tepiştişê parlamenteran bi manşetê ‘Vera HDPyî de operasyonê terorî’ dayî. Yanî tepiştişî ra heta eştişê manşetê rojnameyan heme hetê nê merkezî ra virazîyenî. Nika ra pey heme aşkere û îzehetî do seba meşrûkerdişê tepiştişan bêrî kerdiş. Êdî cayê vatişî nêmendo. Ganî şarê kurd û hêzê demokrasîye biwerzî lingan ser.”
Ganî heme kurdî biwerzî lingan ser
KCKyî îzehetê xo de bale anto hêrişanê topyekunî ser û wina vato: “Hêrişê dagirkerîye tena vera Bakurî de nîyî, vera Rojawan, Başûr û Rojhelatî de yî zî. Nê semedî ra ganî heme kurdî biwerzî lingan ser. Ganî heme partîyê sîyasî yê ke Kurdistan de yî vera hêrişan de vindetişê xo nîşan bidî. Ganî bi taybetî partîyê sîyasî û hêzê demokratîke yê ke Başûrê Kurdistanî de yî vera hêrişan de bivinderî û têkoşîn bikerî. AKP û MHP vernîya demokratîkbîyîşê Tirkîya de asteng î. Îhtîyacê Tirkîya demokrasî yo. Semedo ke AKP û MHP demokrasîye ra tersenî nê hêrişan kenî. Eke hêzê demokrasîye xover bidî, hêrişî şikîyenî û problemê kurd çareser beno. Nê semedî ra ma veng danî heme hêzê demokratan wa têkoşîn bikerî. Şarê kurd zî sere de Amed û heme bajar û qezayan ganî biwerzî lingan ser. Ganî cinî û ciwanî yewna rey nîşanê AKPyî bidî ke îradeya şarê kurdî nêşikîyeno.”
ANF / BEHDÎNAN