Cenîyê ke meydanan de bî kî waştî ke 3ê Tebax zey ‘Dûştê qirkerden û jenosîda cenîyan roja çalekîya mavênnetewî’ bîro qebûlkerden. Dersim û sûkanê bîn yê Kurdistan û Tirkîye de cenîyê ke ser payan de bî mesajê ‘Dûştê DAIŞ û pêrokîn dîktatorîyan zey cenî ma dê bibê jû’ day.
Koyê Jelê de çilayî wekerdî
Azayê Platformê Cenîyan yê Dersim bi munasebetê roj, heta Koyanê Jelê ke wextê Tertelê 1937-38î de cenîyê ke serva raştê îstismarê cinsî nîrê xo kemerranê ci ra eştî rayşî. Cenîyê ke kaşê Koyanê Jelê ke zey ‘heremo qedexe’ îlan bîyo de heta Nîşange ray şî. Azayanê Platformî Nîşange de çilayî wekerdî û dûa kerdî. Hemseroka DBP yê sûk Hulya Yer ke na ca de qisey kerd û va zey qetlîama ke cenîyê Êzidî rî bi rî mendî, 1937-38î de nê koyan de kî virazîya. Ser nameyê Platformê Cenîyan yê Dersim kî Berna Çelebî qisey kerd û hayr ant tarîxî mîyan de fermananê bîn yê Êzidîyan ser.
Êzidî pêrokîn şaran rê benê mînak
Çelebî aşkere kerd ke Êzidîyê ke tarîx ra nat raştê qirkerdenî amey, seserra 21. de zî hetê DAIŞ raştê qiyim û wehşetekê gird amey. Berna Çelebî vist vîrî ke şar û cenîyê Êzidî ke ewro Koyanê Şengal de ciwîyenê bi îradeyê xo yê kollektîf Meclîsê xo yê Şarî û yê Cenîyan ronay û nîya va: “Bi vengdayişê înan cenîyê dinya dûştê jenosîdê cenîyan de roja tekoşînî rê rayverîn kenê.” Reyna bi fikrê ‘pawitenê cewherî heq o’ xopawitenê xo yê cewherî tenzîm kenê û pêrokîn şarê dinya yê ke bin tehdîdê qirkerden û êrişan de yê rê benê mînak.
Raya qirimê cenîyan akerdî
Amed de zî ‘Platformê serva cenîyê ke bi zorî amey giroten tekoşîn’ ver Vîrdarîyê Heqê Merdiman yê Parka Koşuyolu de damûstayîn da. Nûmayişa ke panqarta ‘Xoverdayişê cenîyanê Êzidî azadîyê cenîyan o’ abîya de Hemseroka DBP Sebahat Tûncel, Hemşaredara Sûka Pîl yê Amed Gultan Kişanak, parlementerê cenî yê AMed, cenîyê Êzidî ke Kampa Fhidanlik de manenê ra pîya xêlê temsîlkarê sazgehan û cenî tewr bî. Nûmayiş de sloganê ‘Biciwe xoverdayişê Şengal’ berz bî.
Bi xopawiten cewab day qirkerden
Azaya Kordînasyonê KJA Ayşe Gokkan damûstayîn da û hayr ant qetlîam ser. Gokkan vist vîrî ke hona zî 3 hezar doman û cenîyê Êzidî destê DAIŞ de yê û aşkere kerd ke qirkerdişo ke Şengal de virazîya raya qirkerdişê cenîyan akerd. Gokkan da zonayen ke verikîn ceniyê ke Şengal de yê û pêrokîn şarê Êzidî xoverdayiş tercîx kerd û bi xopawiten cewab da êrişanê qirkerdinî. Gokkan waşt ke 3ê Tebax zey ‘Dûştê qirkerdin û qirimê cenîyan roja çalekîya mavênnetewî’ bîro îlankerden.
Meletî, Sêrt, Êlih, Wan, Colemêrg, Agirî, Îdir û sûkanê Tirkîye Enqera, Stenbol, Mersîn, Edena, Antalya de zî cenî serva wayîrvejyayişê xoverdayiş û tekoşînê cenîyanê Êzidî û protestokerdenê qetlîamî meydanan de bî.
Herzewbîn merasîma gird ya vîrarden zî warê Êzidîxan Koyanê Şengal virazîya. Vîrarden de sozê heyfgirotişê qetlîam û mesajê berzkerdişê tekoşîn ame dayen. Welatanê Awrûpa û cayanê cîya yê dinya de zî serva qetlîam merasîmê vîrarden û nûmayişê protestoyî virazîyay.
JINHA/NAVENDÊ XEBERAN