Nêrazîbiyenê verra êrişa îstismara cinsî ya vera wendekarê lîse M.M yo 16 serrî ramenê. Ceniyanê Çewligij êrişkaran rê nêrazîbiyen damusnay û semedê  biyayiyaş hikûmeta AKP mesûl girotî. 


Îstatîstîkî AKP damusnenê

Goreyê îstatîstikan 2002 ra na het   tacîz, tecawiz û kiştişê cenî û qijan (doman) bîyê vêşîr. Sebebê ney zî polîtîka û zihnîyetê AKP yo. Çike AKP ne cînayetê ceniyan de, ne zî êrişê zey tecawuz de sûcdaran ceza nêkeno, wayrê ci vejyeno. Nayî ra, Tirkîye de her roj bi desan cenî raştê şîdet yenê, taynê ci zî yenê kiştiş. Êrişa îstismara cinsî zî zey sûc nîna hesibnayen. Tewr peynî de, derheqê babeda îstismara cinsî yê Karaman de, Wezîra Malbat û Polîtîkayanê Sosyal Sema Ramazanoglû bi vatişê ‘jew reynî ra teba nêbeno’ wayrê tecawuzkaran vejyabî.Êrişê îstismarê cinsî yê vera qijê 16 serrî M.M de zî dewlet wayrê tacawuzkaran vejya û serbest verada. 


Wijdanê xo keme vindî

Ceniyanê Çewligij cezanêdayişê êrişan rê nêrazîbiyen damusna û semedê zêdyayişê êrişanê hinayî hikûmeta AKP mesûl girot. 

Cenî ya bi nameyê Betul Gumuş vist vîrî ke zey Konya û Karaman û êrişa îstismara cinsî zî Çewlig de qewimî û bêvengiya civakî protesto kerd. Gumuş va, ma wijdanê xo yê civakî kenê vinî û hina dewam kerd:”Ma pêrokînî dirbetin benê. Zey ceniyê Çewlig ma pêrokînî jan ancenê, xemgîn benê. Ma wazenime ke biyayişê hinayî reyna nêqewimê”. 


Ceza nêdayiş

Ceniyan ra Rabîa Korkutata zî hayr ant êrişanê verên ser û da zonayen ke sûcdarî nînê cezakerdiş, yenê xelatkerdiş. Korkutata qewimyayişanê îstismar de ceza nêkerdişî rexne kerd û hayr ant vatişanê Sema Ramazanoglû yê ‘jew reynî ra teba nêbeno’ ser û nêrazîbiyen damusna. 

Halîme Aksoy zî hayr ant zêdyayişê biyayişanê îstismarê cinsî ser û nayî ra hikûmeta AKP mesûl girot. 

Aksoy va, vatişê ‘jew reynî ra teba nêbeno’ yê Wezîra Malbatî damusnenê ke îxtidar ceniyan zey ‘makîneyê zabiyîn’ vînena. Aksoy vist vîrî ke, no zihnîyetê serdest civak de zî rameno û da zonayen ke, nayî ra piya, vatişê sermiyananê hikûmet zî nê qewimyayişan zêdnenê. 

Halîme Aksoy hayr ant hiqûqa welatanê bîn ser û hina va: “Îngilîstan de semedo ke keseke nezdiyê jû keyna biyo û keyna tersnayo ci rê 7 serr û 7 rojî cezayê tepiştiş ame dayen. Pey coy hakîmî ra pers kerdê vatê çima hendayî ceza to day? Hakîmî zî vato, esasî cezayê ey 7 rojiyo. La ê 7 serrî zî semedo ke neyra tepya keyney rehatî bivejyê parq û bigeyrê mi da. Aksoy waşt ke cezayê hinayî bîrê dayen û va, eke welatê ma de zî cezayê hinayî biameybî dayen, do biyayişê hinayî nêameyaybî qewimyayiş.   


 DÎHA/ÇEWLIG