Hurendiyê meseleya ‘çarekerdin’ rojdemê Tirkiye açarniya meseleyê ‘tîvariya hometî’ ser. Hikûmet cayo ke ser demê ‘muzakere’ ‘demokratîkbiyîn’ û ‘çarekerdin’ vindero, qisey bikero, projeyan virazo û na çarçove de gaman bierzo, fina-reyna goreyê xo eyar dana ravêrşiyayişan. Hikûmet nika zî jû qanûna newî ya bi nameyê ‘tîvariya hometî’ kena hadre. Ebi na qanûn onca-fina verra Kurdan herb îlan kena, raya kiştişanê newî akena. Na qanûn înisiyatîfê kiştişê sivîlan dana polîsan û her çî goreyê menfaatê dewlet virazena. Hikûmeta AKP goreyê polîtîkayanê dewlet yê 90 serrî verra Kurdan hiqûq û siyaseta dişmenî şixûlnena. Na hiqûqa dişmenî yê verra Kurdan wextê ronayinê komar ra heta na het ramena. O wextî de Şêx Saîdan û Kurdan mahkemeyanê înfaz yê ‘îstiklal’ de amey cezakerdin, nika zî bin nameyê ciya ciya qanûnan de yenê cezakerdin. Derheqê şarê Kurd de bi desan ‘qanûnê teybet’ yê zey ‘qanûnê tekoşînê verra teror’ vetî. Eslê xo de nê qanûnî wayrê rihê faşîzmî yê. Çi ke jew welato ke ebi nê qanûnan yeno îdarekerdin de kes nêşeno behsê demokrasî û serbestiya fikir bikero. Û jew welato ke demokrasî û azadî nêbo o welat hetê faşîzm ra şino.
Hikûmeta AKP ebi na rojdema newî hewl dana ke Kurdan krîmînalîze û terorîze bikero. Zey ke heta nika Tirkiye de her çî ray de bi, sîstemê do demokratîk estbi, hizûrê welat Kurdî kenê xirab. Tirkiye hewna ebi qanûn û hiqûqê derbe yena îdarekerdin. Şarê Kurd bi serrano tekoşîn dano ke tirkiye qanunanê faşîst ra bireyno û kêberê demokrasî akero. La winî ayseno ke zey sermiyanê dewlet û hikûmet AKP çarekerdişê meseleya Kurd ra hadre niya. Nayî ra destê ci de ne proje, ne perspektîf ne zî na hetî de xerîteya ray esta. Tenya faşîzm û tesfiyekerdişê hereketê serbestî yê Kurd de qerardara. Hikûmet verra ‘projeyê çarekerdin’ yê rayverê şarê Kurd Abdullah Öcalan’î de ‘qanûnê tîvarî’ kerd hadre.
Tenya bîlançoyê didi aşmanê peynî yê giroten û binçimkerdinan dirûmê talokeyî rafîneno ver çiman.  Didi aşmanê peynî de homarê kesê ke amey binçimkerdin nezdiyê 2500 yo. Nînan ra bi seyanê ci zî amey tepişten, nê hewldayinê rehîngiroten hewna zî ramenê. Bi desan kes zî amey qetilkerdin. Nê operasyonê rehîngirotişî rîwalê-qandê ke 6-8’ê cotmeh de tewrbiyînê nûmayişanê sevra Kobanê bî’ yenê ramiten. Serva AKP hêrişkerdişê Kobanê suç niyo, verra nê herîşan vetişê kuçeyan suc o!
Ebi nezdîbiyînê weçînayinanê 2015’î hikûmet nika zî HDP xo rê kerd hedef. Davutoglu, Erdogan, Atalay û niştox û çapemeniya ci ya hetkar ra piya, pêrokîn orkestra şexs dê Demîrtaş’î de hêrişê HDP kenê. Çima? Çi ke HDP ya ke modelê piya-ciwyayişê şaran, kiltûran û ziwanan îfade kena serva ‘jû jûyî’ ‘dîktatoriya AKP taloke ya. Çi ke HDP verra hikûmdarî, sultanî û faşîzma AKP de vindena. Çi ke Demîrtaş’î aşkere kerd ke îyê de ‘paketa reform ya tîvarî’ ya ke ebi rihê faşîzmî amê hadre kerdin qebûl nêkerê. Badê nê qiseyan pêrokîn hikûmet kewt hereket û verra Demîrtaş’î kampanyaya siya-reş day destpakerdin. Erdogan û Davutoglu Demîrtaş’î tehdît kerdî û vatî ke, e ke gonî birijiyo mesûlê nay Demîrtaş o. Erdogan’î zî Demîrtaş’î rê raya mahkemekerdin damisna û ebi nay tehdît kerd. Ebi nê vatenan hurdiyan zî niyet û plananê xo deşîfre kerdî. Winî ayseno ke ebi na paketa tîvarî ya newî hikûmet kiştişan, qetilkerdişan, zext û zorvajî kena hedef.  Verra nê hêriş û tehdîdan gune şar wayrê îradeyê xo yê rêxistinkerdî HDP bivejyo. Çi ke winî ayseno ke kiştoxê qeçik-domonan Erdogan û Dawûtoglu ê dê neyra tepya zî fermanê înfazkerdişê sivîlan bidê. AKP fina-reyna qilerîn-leymin û taloke kaykena. Raya veng-tol vetişê nê kayan û konseptê tesfiyekerdin  ravêrberdişê serhewedayin û xoverdayişê girdî yê şarî yo.