Kampa Mexmurî de serra 40. ya PKKyî bi beşdarbîyayîşê bi hezaran kesan ame pîrozkerdiş û pîrozkerdiş heta saetanê ereyî dewam kerd. Bi hezaran mexmurijî ke mîyan de mamoste, wendekar, cinî, ciwan û temsîlkarê bi desan dezgeyan estbî, beşdarê pîrozkerdişî bîyî.
Bi hezaran kesî sloganê ‘Bicuye PKK’, ‘Bicuye Rayber Apo’, ‘Şehîd Nêmirenî’ û sewbîna eştî. Posterê Rayberê Şarê Kurd Abdullah Ocalanî û flamayê PKK û yê KCKyî ameyî berzkerdiş. Pankartê ke ser o ‘Sere wedarne, şer bike, Rayber Apo azade bike’, ‘Ma bi ciwanî dest pêkerd, ma do bi ciwanî serbikewî’ nuştênê, ameyî akerdiş.
Dima ra Hemserekê Meclîsê Şarî yê Demokratîke yê Mexmurî Huseyîn Karayî qiseykerdişêk kerd. Karayî dîyar kerd ke kedêka girde ya şarê Mexmurî PKK de esta û wina dewam kerd: “PKK partîya şaran o. Rayber Apo zaf kede seba na partî da û ard heta roja ewroyî. Rayber Apoyî vatênê ‘doman û wendekarê Mexmurî domanê min î’. Ganî şima zî bibî layîqê nê xoverdayîşî û rayberîya xoverdayîşî bikerî.”
Dima ra mesajo ke Hemserekê Konseyê KCKyî Cemîl Bayikî seba pîrozkerdişî erşawitbî, ame wendiş. Mesaj hetê bi hezaran kesan ra bi hawayo baldar ame goşdarîkerdiş.
Qiseykerdişan ra dima Grûba Şehîd Çîyagerî, ekîbê folklorî, hunermendê herême beşdarê pîrozkerdişî bîyî. Cinîyî bi cilanê xo yê herême beşdarê pîrozkerdişî bîyî. Bi hezaran kesî deyîrî vatî û heta saetanê ereyî govend girewtî.
ROJNEWS/MEXMUR