ZEYNEP TURGUT / JINNEWS / WAN
Êzidî û êzidîtî her hetî ra raştê hêriş û çinîkerdişî ameyî/yenî. Tena merdimî nê bawerî, kultur û hunerê înan zî raştê hêrişî yenî. Tewr peynî Wan de goristanê êzidîyan raştê hêrişê defînegêrayoxan ameyî.
Qezaya Ebexî ya Wanî ra girêdaye dewa Qopikanî de mezelê ke aydê êzidîyê ke seserra 18. de cuyayî, estî. Zîndano tarîxî ke hetê Kok Axayî ra seba kênaya xo dîyabî viraştiş û mezelê ke dormeyê zîndanî de yî hetê defînegêrayoxan ra ameyî taxrîbkerdiş. Goristano ke heta roja ma ya ewroyî ameyo, nika çinîbîyayîşî reyde têrî yo.
Dewijî dîyar kerdî ke defînegêrayoxî ewil mezelan tespît kenî, dima ra ê mezelan taxrîb kenî û çîyanê erjinan tirawenî. Goreyê kulturê êzidîyan, cinîyî bi çîyanê xo yê bierjan yenî definkerdiş. Cok ra defînegêrayoxî zî ê mezelan tespît kenî û înan tirawenî.
Heta nika bi seyan mezelî ameyî kinitiş û esteyê ke mîyanê ê mezalan de bî, heme erzîyayî orte. Dewijî na rewşe ver eciz î û wazenî no goristano tarîxî wa bêro pawitiş û na hovîtîye zî wa peynî bibo.