SERKAN DEMİREL / ANF /LOZAN
Bi nameyê Alî Wazîrî de ciwanêkê rojawanijî seba ke bêvengîya Milletê Yewbîyayeyî û hêzê mîyanneteweyî protesto bikero, bedenê xo da adirî ver û bi hawayo giran birîndar o. Se ra 84ê bedenê Wazîrî veşayo û tehlukeyê ci yê mergî dewam keno.
Birayê ci Mizgîn Wazîrî derheqê çalakîya birayê xo de qisey kerd. Bira Wazîrî va ‘Alî hêrişê dagîrkerîye yê dewleta Tirkî û bêvengîya hêzanê mîyanneteweyî ra zaf eciz bi’ û wina dewam kerd: “Alî vera hêrişanê dagîrkerîye de zaf hêrsin bi û hertim averşîyayîşan taqîb kerdêne.”
Mizgîn Wazîrî dîyar kerd ke Alîyî hertim înan ra vato “Qey şima nêvînenî? Serêkanîyê de hende şehîdî estî. Cinî, doman û extîyarî kişîyenî. Merdimî cayê xo ra koç kenî. Dişmeno dagîrker û zalim hewl dano şarê ma bipelçiqno.”Bira Wazîrî da zanayene ke Alîyî hertim fotografê şehîd û sivîlan ra ewnîyayêne û xemgîn bîyêne û seba ke nêşênayêne çîyêk bikero, zorê ci şîyêne.
Wa vera qetlîyaman de bêveng nêmanî
Bira Wazîrî qala çalakîya Alîyî kerde û wina va: “Bano ke ma tede mende, qarşîyê Milletê Yewbîyayeyî de bi. Xora birayê mi rojêkê verê qala Milletê Yewbîyayeyî û bêvengîya ci kerdbî. Aye şewe ez kişta ci rakewte bîya, ez xwe hesîyaya ke vengê ambulansan yeno. Ez û birayê xo ma dî ke Alî çin o. Wexto ke ma xo resna ambulansan ma dî ke Alî tede yo. Alî polîso ke ewja de yo rê vato ‘mi bedenê xo seba Rojawanî veşnayo’. Wa bêro zanayene ke ewro Ewropa de bi hezaran Alîyî estî ke eşkenî xo veşnî. Cok ra wa bêveng nêmanî.”