Rojnameya Ingilîz “The Times”ê li ser Mihemed Hedîd ê ji Serê Kaniyê nûçeyeke berfireh hazir kir. Di nûçeyê de weke kurê wêrek ê Kurd behsa Mihemedê niha 13 salî tê kirin. Nûçe bi bîr dixe ku dewleta Tirk di êrişa xwe ya dagirkeriyê ya li dijî Serêkaniyê û Girê Spî de bombeyên sotîner, xasma yên bi fosfora spî bi kar anîne û birînên kûr ên di nava canê Mihemed jî bi îhtîmaleke mezin ji ber van bombeyan çêbûne. Rojname bi bîr dixe ku pêşî ji ber êrişa dagirkeriyê ya li dijî Efrînê malbat koçberî Serêkaniyê bûye û paşê jî li Serêkaniyê careke din bi êrişên dagirkeriyê yên dewleta Tirk re rûbirû bûne. Mihemed piştî 7 emeliyatên çandina çermî û sed rojan li nexweşxaneyê vegeriya Kurdistanê. Ew ji rojnamevanê The Timesê Anthony Loyd re peyivî û xwe weke saxfilitî bi nav kir. Ew dibêje, êdî ew ji ti tiştî natirse, ji ber ku ji ya herî xirab jî filitiye. Ew wekî din dibêje, xewna wî ye bibe bijîşk, da ku weke bijîşkên Fransî yên ew ji mirinê xilas kirin, xelkê ji mirinê xilas bike. Rojname îşaret bi banga Sekreterê Giştî yê Neteweyên Yekbûyî António Guttares dike yê ku xwestibû ji ber krîza vîrusa koronayê agirbesteke kurewî bê ragihandin. Lê li gorî rojnameyê li Sûriyê şens pirr kêm e ku ev bibe. Dîsa rojnameya The Timesê bû par di Cotmehê de bûyera bikaranîna sîlehên kîmyewî kiribû rojeva navneteweyî tevî sûcên dewleta Tirk ên li dijî sivîlan û xasma Mihemed bi xwe jî. LONDON