Di çarçoveya mîhrîcana ku 3 rojan berdewam kir de gelek şahî û konser hatin lidarxistin, welatiyên beşdarî mîhrîcanê bûn dîmenên rengîn derxestin holê û di axaftinên hatin kirin de peyamên piştgiriya ji bo Şoreşa Rojava derketin pêş. Di roja dawî ya mîhrîcanê de bi hezaran kesan bi def û zirneyê govend gerandin. Di çarçoveya bernameyê de piştî nîvro bi beşdariya KURDÎ-DER û saziyên sivîl ên civakî pêşbirka zanyarî hate lidarxistin. Di pêşbirkê de têkîldarî wêjeya kurd, dîroka kurd, têkoşîna azadiya kurd pirs hatin pirsîn. Di pêşbirkê de navçeya Cizîrê bû yekemîn, navçeya Elkê jî bû duyemîn. Piştî pêşbirkê Koma Folklorê ya Şaredariya Elkê reket ser dikê. Piştre jî kesên ku di pêşbirkan de bi ser ketine xelatên xwe wergirtin. Di merasîma pêşbirkê de welatiyê bi navê Selîm Durmuş ê ku di pêşbirka berxikên fehl de bi serket xelata xwe diyarî kampanyaya alîkariya Rojava kir.

Piştî merasîma xelatan dîwana Dengbêjên Botanê derket ser dikê û stranên ku ber bi jibîrkirinê ve diçin stran. Dîwana Dengbêjan eleqeyeke mezin dît.
Di şeva dawî ya mîhrîcanê de sînevîzyona HPG’iyên ku di 2012’yan de li çiyayê Kato jiyana xwe ji dest dane hate pêşandan. Dema ku sînevîzyon qediya welatiyan demeke dirêj dirûşmên “Bijî Serok Apo”, “Şehîd namirin” ve “Bi can bi xwîn em bi te re ne ey Serok” berz kirin.
Di konsera dawî ya mîhrîcanê de jî coş derket asta herî jor. Koma Dengê Amara, Hozan Hediye, Koma Pel, Bulent Turan û Hozan Suar derketin ser dikê û konser serê sibehê bi dawî bû. Piştî konserê axaftina girtinê ya mîhrîcanê hate kirin. Li ser navê Komîteya Amedkar a Mîhrîcanê Îsmaîl Erk spasiyên xwe beşdaran kir û hêviyên xwe yên ji bo mîhrîcana 2015’an anî ziman û got ku ew hêvîdar in mîhrîcana 2015’an bi çandeke azad û bi Rêbertiya azad ve li çiyayên azad pîroz bikin. Erk ji bo piştgiriya Rojava û girtiyên nexweş banga bihîstiyariyê kir.
Piştî ku mîhrîcan bi dawî bû welatiyên ku 3 roj in li zozana Laleşê ya çiyayê Kotanê konê xwe kom kirin û ber bi malên xwe ve derketin rê.

ŞIRNEX