Azad Mîrkan ser beşdarbîyîşê xo û cuya PKKe de qalî kerd.
Min sosyalîzmî şinasna
Mîrkan ciresna ke sosyalîzm û vîrdozîya PKKe ser ci de bandorêko gird viraşt û wina verdewam kerd: “Ez serra 1995 de Bakuya Azerbaycanî de ameya dinya. Ez qezaya Agdam ê Karabagî ke encamê pêkerdişê Azerbaycan û Ermenîstanî de Ermenîstanî ra ameya veradayîşî ra ya. Badê ke pîyê min wefat kerd, gêrayîşê min dest pê kerdî û ez resaya no encamî ke ez eşkena verpersê gêrayîşê xo mîyanê sosyalîzmî de biveyna. Aye çax ez Azerbaycan de dormeyê sosyalîstan reyde kom bîynê û ez beşdarê mîtîng û çalakîyanê înan bîynê. Seba ke min ciwanan kom kerdênê û kulûbê pirtukan min awan kerdbî, ez zanîngehî ra ameya eştiş. Çimkî çîyo ke tewr zaf dewleta Azerbaycanî tersnaynê, wendişê pirtukan bi. Min înternetî ser o aktîvîteyê ciwanê sosyalîstî yê Yewnanîstan û Tirkîya şopnaynê. No semedî ra ez ameya Tirkîya û seba ke karê min ê pasaportî derg bi, ez embazanê xo yê azerî yê ke Enqere de menda.”
Wayîrê rûmetî vejyayî
Mîrkan dergeyîya qalîkerdişê xo de ard ziwan ke wexto ke o Enqere de mendênê, aye wext o cuya komunal şinasnayo û wina domna: “Na cuye ser min de xeylî bandor viraşt. Embazê min her tim qala sosyalîzm û birayîya şaran kerdênê.Badê ke min no raybazê cuye yê embazanê xo dî, gêrayîşê min hîna vêşêr bî. Min êlula 2014’î de tevgerê azadîye şinasna. Hedîseyê ke Kurdistan de qewimyenî bî sebeb ke ez hîna zafêr şarê kurdî bişinasna. Min Kurdistano Vakurî zaf meraq kerdênê. Kêfê min zaf gerîlla ra ameynê û min zaf waştênê ke gerîllayan biveyna. Şorişê Rojawanî yê ke dijî DAIŞe xoverdayîşêko gird nîşan da û rûmetê merdimîye ra wayîr vejyay, biregirewtişê min de zaf bandor viraşt. Nîsana 2015 de ez bi 3 embazê xo yê azerî û 4 embazê xo yê kurdî reyde beşdarê gerîlla bîya.”
Rindîya koyê azad: Cenî
Mîrkan qalîkerdişê xo de bal ant ser cuya xo ya 7 aşman ke Besta-Cûdî de vîyarna û wina vat: “Her çend ke ez beşdar bîya zî, wexto ke ez wêneyê gerîllayê qadê cîya veynena bi coş bena. Heta aye wext rindîyê ke min qet nêvînaybî, min tîya de dî. Min merdimîye tîya de dî û ez xoza ra bîya yew û beşdarê cuye bîya. Mîyanê nê rindîyan de tewr zaf cenî û vindertişê cenî min ser o bandorêkô gird viraştênê. Min yewna ray dî ke çiqas girêdayê Rayber Apo yî. Min dîn, ehlaq, merdimîye, embazîye û sewbîna xeylê çî tîya de dî. Ez 21 serre ya la wina aseno ke min 20 ser bi deyîra şaş goveng girewto.”
Mîrkan tewr peynî veng da û wina vat: “Şorişê ke Kurdistan de yeno kerdiş heman demî de şorişê kurd, laz, tirk, azerî, çerkes, ereb, ermenî û sewbîna yo zî. Ti çend wayîr bivejyî hende no şoriş yê to yo zî. Wa ciwanî bêrî beşdarê refê gerîlla bibî.”
DÎCLE ARYA/ANF