Merdim heme cayê Sûrîye û Rojawanî de raştê şopê şorişgero pîl û serewedarkar Osman Sebrîyî yeno. Efrîn, Heleb û Şamî ra dima nika zî şopê ci Minbic de vejîya orte. Warezayê Osman Sebrîyî Fadil Kodreş Minbic de cuyeno.
Fadil Kodreş nika 55 serreyî yo, zewejnaye û pîyê 5 domanan o. Kodreşo ke 25 serrî yo ke Minbic de cuyeno, eslê xo de dewa Karamokî ra yo. Fadil Kodreş nika mîyanê hêzê pawitişê sîvîlî ke hewl danî Minbicî azad bikerî de ca gêno.
Kodreş va ‘ez tornê waya Osman Sebrîyo ke sey Apê Osman yeno şinasnayîş a’ û qiseykerdişê xo wina domna: “Ez şêra kura, qala Osman Sebrîyî kena. Ma şenikîya xo ra nata zanayêne ke Apê Osman xalê ma yo. Labelê ma nêzanayênê ke Apê Osman kam o. Ma dima ra girdî û qehremanîya ci musayî.”
Dapîra mi ma ra nêvatêne
Kodreşî dewamê qiseykerdişê xo de va ‘nizdîyê 50 serrî verê, wexto ke ma doman bî, mi Apê Osman Sebrîyî dî’ û qiseykerdişê xo wina domna: “O wextî Apê Osman seba ke dapîra ma ziyaret bikero, amebî. O wext ez 7 serreyî bîya. Dapîra mi tim vatêne yew xalê şima esto, la nêvatêne ke Osman Sebrî xalê şima yo. Osman Sebrîyî sey tucarêk bi ma daye şinasnayîş. Dapîra ma vatêne ‘xalê şima Şam, Heleb, Qamişlo û Dirbesîyê de maneno, seba ke pere qezenc bikero tîya ra tutun beno ê cayan de roşeno’ Wexto ke ez bîya pîl, Apê Osmanî êdî nêşînayêne bêro; çimkî êdî extîyar bîbî. Mi rojêk dapîra xo ra va ‘çira to nêva Apê Osman xalê şima yo?’ Ya zî va ‘seba ke dewletê herême pey ci de bî, seba pawitişê ci mi şima ra nêva’.”
Ma dima ra fam kerd
Kodreşî peynîya qiseykerdişê xo de wina va: “Wexto ke ma pîl bîyî, ma dîy ke Apê Osman hesretîya azadî anto. Ma zî nika eynî çîyan hîs kenî. Çîyo ke Apê Osmanî waştêne, ewro Rojawanî de virazîya. Ganî Apê Osmanî nê rojan bidîyêne. Çimkî o heme cuya xo seba têkoşînî feda kerdbî. Tevgerê Azadîya Kurd û jenerasyono ke xalê mi ra dima ame, xoverdayîşêko newe xelq kerd. Cok ra yê ke wazenî ke Şorişê Rojawanî xira bikerî, merdim eşkeno vajo ke xeyal vînenî.”
SEYÎT EVRAN / ANF / MINBIC