22ê Nîsana 1898 de paytextê Misirî Kahîre de Mîkdad Mîdhat Bedirxanî Rojnameyê Kurdistanî vetbî û na roje her serre sey Roja Rojnamegerîya Kurdî yena pîrozkerdiş. 

Roja Rojnamegerîya Kurdî de 43 rojnamegerê kurdî û pêro pîya 166 rojnamegerî zîndanan de yî. Her çiqas ke serrêk ra zêde yo ke ameyî tewqîfkerdiş zî, îdîanameyê înan amade nêbîyo. 

Sûcê viraşte: "Endambîyayenê rêxistine"

Abdulkadîr Turay 6ê gulana 2016î de qezaya Stewrê ya Mêrdînî de bi îdîaya ‘hetkarî dayo rêxistine’ amebî tewqîfkerdiş. Nizdîyê 11 aşmî yo ke ameyo tewqîfkerdiş û Zîndanê Tîpa E yê Mêrdînî de maneno. Îdîanameyê ci heme amade nêbîyo.

Mudirê Xeberan yê DÎHA Omer Çelîk zî 25ê kanûna 2016î de keyeyê xo de bi derbkerdiş ame tepiştiş û erşawîya Stenbol. Çelîk 24 rojan ra dima ame tewqîfkerdiş û erşawîya Zîndanê Tîpa Lyî yê Sîlîvrî. Muxabîrê DÎHA yê Agirî Abdullah Kaya zî 21ê çileyî de bi îdîaya ‘endamê rêxistine bîyayene’ ra ame tewqîfkerdiş. 

Îdîaname çin o 

Muxabîrê DÎHA yê Wanî Îdrîs Sayilgan zî 21ê teşrîna verêne de, bi îdîaya ‘endamê rêxistine bîyayene’ ra ame tewqîfkerdiş û erşawîya Zîndanê Mûşî. Sayilgan nika Zîndanê Tîpa E yê Trabzonî de yo. Muxabîrê DÎHA Mazlum Dolan zî 23ê sibata 2016î de qezaya Sûrî ya Amedî de ame tepiştiş û erşawîya Zîndanê Tîpa Dyî yê Amedî. Doza Dolanê kanûna 2016î de Amed de ameye dîyayîş. Muxabîrê DÎHA Mehmet Guleş zî 7ê kanûne de ame tewqîfkerdiş. Guleş nika Zîndanê Tîpa E yê Xarpêtî de maneno.  

Muxabîrê DÎHA yê Geverî Nedîm Turfent zî bi îdîaya ‘endamê rêxistine bîyayene’ ra 13ê gulane de ame tewqîfkerdiş. Doza Turfentî do 14ê hezîrane de bêra dîyayîş.  Muxabîrê DÎHA yê Wanî Zîya Ataman zî 10 nîsana 2016î de ame tewqîfkerdiş. Ataman nika Zîndanê Wanî de maneno. 

Raştê hêrişê polîsan ameyêne

Muxabîrê DÎHA yê Wanî Selman Keleş 20ê adare de Wan de ame tepiştiş û 30ê adare de zî ame tewqîfkerdiş. Keleş verê cû xeylê reyan raştê hêrişê polîsan ameyêne. 

Hetê muxabîranê DÎHA de Mudirê Karê Nuşteyan yê Ozgur Gundemî ke bi KHKyî amebî padayîş Înan Kizilkaya zî 29ê tebaxe de ame tewqîfkerdiş û erşawîya Zîndanê Tîpa Ryî yê Metrîsî. 

Vilakarê Rojnameyê Azadîya Welat û Ozgur Gundemî ke bi KHKyî ameybî padayîş ra 18 vilakarî zî zîndanan de yî. 2 edîtorê kovara Ozgur Halkî, Mudirê Karê Nuşteyan yê Rojnameyê Demokratîk Ulusî, 3 xebatkarê Radyo Karacadagî, 2 xebatkarê Radyo Sesî nika zîndanan de yî. 

YRD pîroz kerd 

Yewîya Resnayîşê Demokratan (YRD) bi îzehetêko nuştekî 22ê Nîsane Roja Rojnamegerîya Kurdan pîroz kerde. YRDyî wina vato: “Çapemenîya kurd seba azadîya şarê kurd, îrade û cuyêka demokratîke mîsyonêko gird girewta milê xo ser. Rojnameyo yewin yê kurdî 22ê nîsane 1898 de paytextê Misirî Kahîre de hetê Mîktad Mîthat Bedîrxanî ra ame vetiş. Çapemenîya kurd hetê azadîya şaran û raştîyan de ca gêna. Kedkarê kurd raştê hêriş, tewfîqkerdiş û qetilkerdişan yenî. La qet karê xo ra tavîz nêdanî.”

Raştî vîrê kedkaran ra resenê

YRD vist vîrî ke rojnamegerî Tirkîya, Başûr, Şengal û Rojawan de bîyî hedefê çeteyanê DAIŞ, PDK û AKPyî û wina qedêna: “Prosesê nikayîn seba kurdan prosesêko tarîxî yo. Kulturê xoverdayîşî Mazlum Dogan ra bigîre heta Apê Musa, Rohat Aktaş û Evînan hêz dayo têkoşînê ma ya ewroyîn. Raştî vîrê kedkaran ra reseno qalem û ekranan.”  


 DÎHABER/AMED