Roje çin a ke têkilîya hukmatê AKP û Serekkomar Erdoganî bi rêxistinanê cîya-cîyayan reyde nêvejîyo orte. Yeno zanayîş ke Vakurê Kurdistanî de verê cû bi desan reyde têkilîya hukmatê AKP û rêxistinanê çeteyan vejîyaybî orte. Hukmatê AKP û Qesra Beştepe bitaybetî vera şarê kurdî û heme muxalîfanê bînan de nê rêxitinanê çeteyan dana xebetnayîş.
Bitaybetî rêxistinê çeteyan ra yê ke nameyê înan hîna zafêr vejîya aver nê bîy; Tîmê Esadullahî, DAIŞ, El Nusra, SADAT, Tugayê Heyfgirewtişî Tirkîya (TÎT), Ocaxê Alperenan, Ocaxê Osmanîyan û sewbîna. Nê rêxistinê çeteyan hîna zaf Rojawan û Vakurê Kurdistanî de ameyî xebetnayîş. Nika vejîya orte ke hukmatê AKPyî dest eşto, Başûrê Kurdistanî û ewja de zî wazeno zîhnîyetê xo rêxistine bikero.
Bi nameyê dîplomasî
Keyepelê lekolîn.orgî de goreyê xebera Goran Akreyîyî rejîmê Erdogan û AKPyî Başûrê Kurdistan û Îraq de ser Cepheyê Tirkmenî ra faalîyetanê xo zêde kerdo. Endamê Teşkîlatê Îstîxbaratî yê Milî (MÎT) wexto ke seba pêvînayîşê fermî Îraq ziyaret kenî, bin nameyê nasnameyê dîplomatîkan de Vera PKK û şarê kurdî de faalîyetanê îstîxbaratî kenî.
Vejîya orte ke MÎTê Tirkîya Başûrê Kurdistanî de çarçeweya Cepheyê Tirkmenî de bi nameyê Teşkîlatê Îstîxbaratî yê Tirkmenelî (TÎT) awan kerdo. MÎTî logoya teşkîlatê TÎTî daxî bi xo amade kerdo. No teşkîlat hîna zaf herêmanê Kerkûk, Duzxumatu, Kelar, Kifrî, Mexmur û Şengal de faalîyetê îstîxbaratî meşneno. Xora ameyêne zanayîş ke ciwanê ke çeteyanê DAIŞî ra remaybî, hetê komeleyê ke giredayeyê tirkmenan î ra perwerdeyê sîlehî dîyayêne înan.
Nakokîya mîyanên
26ê teşrîna verêne 2016 de vernîya Walîtîya Kerkûkî de Subayê Îstîxbaratî yê Tirkmenî Abdulemîr Cuma hetê kesê ke nasnameyê înan dîyar nîyo ra raştê suîkastî amebî. Abdulemîr Cuma bi hawayo giran neqlê nêweşxaneyî bîbî. Yeno vatiş ke no suîkast nakokîya mîyanên yê Cepheyê Tirkmenî ver bîyo.
Yeno zanayîş ke tirkmenî û Cepheyê Tirkmenî ke Îraq û Başûrê Kurdistanî de yî verê cû kontrolê cematî de bî. Lejo ke mabênê cemat û AKPyî de ameyo cuyayîş, yeno vatiş ke nika no lej mabênê tirkmenê ke tîya de yî yeno cuyayîş. Tîya de yew grûbe kontrole MÎTî de ya. Grûba bîne zî hema zî kontrolê cematî de ya. Serekê Pêroyî yê Cepheyê Tirkmenî Erşad Salih zî kontrolê MÎTî de bî.
Enerjî de pêkerdî
Goreyê çimeyanê herême, pêvînayîşo ke mabênê Serekwezîrê dewleta tirk Bînalî Yildirim û Serekwezîrê Îraqî Ebadîyî de virazya, teberê pêameyîşê ekonomîk û enerjî de sewbîna pêameyîşî nêameyî viraştiş.
Qebul nêkerdo
Reyna goreyê zanayîşê ke çimeyanê herême dayî, heyeto ke bi serekîya Serekwezîrê tirk Yildirimî de şîbî Îraq, Serekwezîrê Îraqî ra wazenî ke mektebê cematî bêrî padayîş. Labelê Ebadîyî vato ‘nê mekteban de welatîyê ma wanenî û vera ma de ti falîyetê înan çin o’ û waştişê înan qebul nêkerdo. Reyna goreyê çimeyan Ebadîyî operasyonê teberê sînorî û babeta Şengal de zî waştişê heyetê tirkî qebul nêkerdo û do îmze nêerzo pêameyîşan.
MERKEZÊ XEBERAN