Erdogan nê mitîngî de qîreno û vano: “Allah û ekber û bi no qîrayîşê welat, miletî ra yew netew, yew ziwan, yew beyraq ra propagandaya qirêjî keno.” Mîtîngê beyraqan yeno çi manaye? Nê heme mitîngî hemverê şaran ra dişmentî ya, nîjadperestî ya. Kam ke AKP ra nîyo se heme kesî dişmen hesibnenê û sucdarê bi potansîyel hesibnenê. Şureqaya AKP û Erdoganî viraştişê nê mitîngan ra propagandaya weçînayîşî kenê. Halbûkî nê propandaya weçînayîşî bi serê xo yew suco giran o. Ewta de beyraqa kamî remaya ke nê beyraqa tepîşenê û kewnê raşteyan. Serekwezîro emanetkar û nêmeşru Ahmet Davutoglu vano: “Ma HDP binê bendê weçînayîşî de vindarnenî.” 


‘Ma do qirkerdiş bivirazî’

No warî de yanî vatişê Davutogluye ke vano ma bi zorakî nê weçînayîşê Yewê Teşrîne qezenc kenê. Erdogan zî hewayê papaganî na ray zî şarî ra 550 wekîlan wazeno. Erdogan bi eşkerayî vano: “ Eke şima nê 550 wekîlan nêdî ma û ma zî heme tewr qirkerdiş virazenê.” Xora heremanê ke HDP tede serkewena enkay ra nê cayî, sey cayê asayîşî ilan kerdî. Na zî AKP û Erdogan senî hewa bawerî kenê ke û kewnê weçînayîşî, nîşan dano. No warî de hema hema her roj seba weçînayîşî anketî virazîyenê û gorê nê anketan ra AKP bi her awayî de kewnê binê se ra 40-38. No weçînayîşê 1’ê teşrîne de senî hewa yew weçînayîş beno, hema zî dîyar nîyo.


Wina bibo do weçînayîş nêbo

Şureqaya Qesrê Erdoganî ana aseno ke şerê taybetî de israr kena. No warî de newe ra tîmê taybetan û panc hezarî cerdewanan gêna. Eke no hewa şer dewam bikero se, bi rewşa weşî de yew weçînayîş nêbeno. Xora AKP zî ana yew rewşa qaos û têmîyankewtişî wazena. No warî de bi gorê fikrê mi zî nê weçînayîşê 1’ê teşrîne de no hewa weçînayîş nêbeno. HDP metropolanê tirkan de bi rewşa weşî de nêeşkena ke xebatê rayvistişî yê weçînayîşî bikero. 

Herema Kurdistanî de zî Şureqaya AKPe enkay ra zaf cayan de cayê asayîşî ilan kerdo. Nê şert û mercan de senî hewa yew weçînayîş beno? Belkî no hewa yew rewşa qaos û têmîyankewtişî hesabê AKP ra yeno û AKP nê sebeb ra kewna weçînayîşî. Enkay ra AKP hîle û xurde kena û bi nameyê mitîngê beyraqan ra mîtîngê weçînayîşî ya AKPe kenî. No warî de AKP yew hetî ra zî Partîya Hur Davaye ra bi rewşa limiteyî ra tîfaq kena. Partîya Hur Davaye nêkewna nê weçînayîşî 1abelê teşrîne û bi hesaban ra Partîya Hur Davaye nê weçînayîşî de weçînitox û endamanê xo zî serbest veradana. 


Qetilîyaman îtîraf kerdî

Şureqaya AKPe heme tewr ra şerê xo yê qirêjî ra dewam kena. Yew hetî ra sivîlan, gedeyan qetil kena û heto bîn ra zî şehîdgehan sero bombe varnena. No warî de şureqaya AKP û Erdoganî de yew şeref û rumet nêmendo. Hem sivîlan û gedeyan qetil kenê û hem zî vanê ma sivîlî nêkiştî û înan xo bi xo yewbînan kişto. Serekwezîrê emanetkar Davutoglu vano: “Eke HDP xoserîya demokratîkî de israr bikero se, ma zî cewabê înan danê.” Yanî Davutoglu vano ke heyana nika ma senî hewa gedeyî û sîvîlî qetil kerdî û ma ancîna zî qetil kenê. Davutoglu hetta vano ke seba bombevarnayîşê şehîdgehan ra min bi xo bire dayo. No hewa polîtîkaya qirêj û çîrkefî rey senî hewa serkewtiş bena. Kurdistanî de AKP qedîyaya û no semedî ra ke hinde zaf har bîya.



Hesabê AKPe netepîşenî 


Ancî zî nê hesabê qirêj ê AKPe nêtepîşeno. AKP seba ke Amedî de endamê namzetê xo dîyar kerdî û lîsteyo verên de Galîp Ensarîoglu nîşan da û heto bîn ra zî seba ke datîzay Ensarîogluye Salîm Ensarîogluye namzet nênawit û nay ra zî Mehmet Ensarîoglu sey xoser xo namzet nawit. Rihaye de seba ke Îbrahîm Tatlisesî waşt ke xo AKPe ra namzet binawno, AKP zî endamtîya Tatlisesî qebûl nêkerd, Tatlisesî zî nê weçînayîşî de xo, xoser nawit. Keza AKP no warî de ancî zî Muhsîn Kizilkaya namzet nênawit. Ancî zî Serekê Egîtîm-Bir Sen a Amedî Yunus Memiş ke heman wextî Huda Pare ra yo û rewşa ey zî xoser yew hedîseya gird a. Bi taybetî no warî de yew tewr maskarayey esta. Nê maskareyeya namzetanê AKPe hînê kura bena se, bena kayê şanoye.


ZAZA CEBELÎ