Ez çend hefteya Fransa de gêrena. Şarê Kurd yê Fransa, qey weçînayîşê 7’ê Hezîrane sey morcelayan karkeno. Sey bizotê karkeno. 

Qeydkerdiş û amedekerdişê weçînitox û mişewîran zî qedîya.

Seba Mîtîngê Parîsê verê cu ra xebatêk gird ame ramnayîş. Bîletên ke qey destekkerdişê HDP’ê amebî vilakerdiş, giranîyê ayê bîletan ameyê rotiş.

Verênîyê Mîtîngê Parîsî de, herkes meraqkerdenê û vatanê mîtîng seyî biveyîro.

Ewropa de bîyo edet ya, herkes telefonê xo yê apyoîd ra ewneno rewşe hewayê. Kam ewnenê rewşe hewayê, vatenê roja mîtîngê varan vareno. Vatanê, seba varayîşê varanî mîtîng rind derbas nêbeno.

Ê tayî însanê berênê mîtîngê. 

Ca ca de mi zî cewab denê qiseykerdişê hina û mi vatenê wa varan zî bivaro, gera reyna herkes bîyero mîtîngê. Çunke no weçînayîş seba şarê kurd zaf muhîmo. Şima hina qiseykenî rast nêbeno.

Zobî Ewropa de zî bîyo edet, wexto ke mîtîng û civîn benî, herkes vano, na saet de mîtîng û civîn esto, la herkes herê bero, ma zî tayî here şinê. Her wext hina beno, ina hew zî hina beno.

La Mîtîngê Parîs yê HDP, pêronê nê vînayîşan da kiştêk. Şarê Kurd zaf lez û bez Meydanê Rebûblîke dikerd.

Ayê ke beşdarê mîtîngê bîyê giranîyê înan hetê Mereş, Dersîm ra bî. Serhedijî Parîs de zafî, la gore hûmarê xo nîameyêbî mîtîngê. Hina aseneke şarê mayo welatparêz ayo ke rojên bîn de zaf nêasenê, zafê înan vazdabî û amebî mîtîngê.

Hûmarê mîtîngê 10 hezar zêdeyîr bi. Wexto ke mîtîng xelas bi hîna zî şarê ma ameyenê. 

Ciwanê zaf amebî. Mîtîng zaf bi coş û heyecan bi. Wexto ke Selahaddîn Demîrtaş vejîya ser dîke, pêlbîyayîşêk kewti mîyanê şarê ma.

Meydanê mîtîngê girêyayenê. Seyî awa ke destpêkena girêyayena, bilq û bilq kena, meydan de zî bilq û bilqî destpêkerd. Qiseykerdişê Selahaddîn Demîrtaş ra coş û heyecanê şarê ma hîna zêde bi. Bi coş û heyecan ra pîya, herkesî bi baldarî Selahaddîn Demîrtaş goştarîkerdenê. 

Meydanê mîtîngê mi kamî ra qiseykerdenê, hema hema xeylê înan vatenê ma telefon kenî welat, welat de zî merdimanê xo ra vanî rayanê xo bidenê HDP. Tayî merdimanê ma, verê cû rayê xo denê partîyanê bînê, nika vanî ma danî HDP.

Mîtîngê Parîs de hêvî û bawerîya şarê kurd zaf xurt asenê. 

Mîtîngê Parîsê nimûne û mîsal bîyero girewtiş, qet û qet problemê bend yê HDP çino.

Eger hemi welatên Ewropa sey Fransa benê, Ewropa de 400 hezar zêdeyîr ray û dengê HDP vejîyenê.

Mîtîngê Parîs ra, îspat bikî birêxtinbîyayîş serkewtişên gird virazîyenî.

Şarê ma bi eynî şedîyayîş, coş û heyecan rayê xo zî bido HDP û bipawo û 8’ê Hezîran de destanêk newe yeno viraştiş.