Vano ‘sima xêr amê serranê 90!’
Nî rozanê peyenan de fekê eyra qeyta jû vatîso xêr û newe nêvejîya. Verva weşîye dano pêro. Kam venga ci dano bido, cevabê ey gon ya. Mayî seweta haştîye cerenê vero, o herb ra qeseykeno. Vijdan te de nêmendo.
Tam jê serranê 90 yo.
Çîyê no fîşto tenge, raya xo nêvîneno, hêfê naye Kurdan ra ceno.
Gorê mi mesela Surîye kî na hal de jû rol kaykena.
Hukumato Tirk vişîyo pêro. Surîya de belka Kurdî benê serbest. Naye ra ters û xof kewto zere. Tavat tey nêmendo. Dîna vurîna avê sona, hukumato Tirk peyser sono serranê 90.
Qeseykerdîsê xo yê netevê Tirk de Kurdan rê jê bare herb vet. Nî rozanê bimbarekan de bîle heq ra xo vîrî nêard. Eke destebera ci bêro, mavênê jû deqa de Kurdan kiseno.
Ancax însanê ke îtîqatê xo çîno nîya qeseykenê. Mordemo ke zerre de hebê tersê heqî esto, çi beno bibo, nî rozanê bimkbarekan de bi na tore qalnêkeno.
Mirê hen yeno ke vurnayîsê ke na dîna ma wa ewroyene de benê, hukumato Tirk fîşto royî ver. Belka hen nêoseno, hama hêrs, ters, xof û bê sebrîya Recep Tayyip Erdoğanî naye nîsan danê. Eskerakerdîsode bîn nîno aqilê mi.
Qafikê xo sewq dano, hama zerrê xo, dendikê xo xerepîyo. Na sîsteme zerre ra bena puç.
Erdoğan çîye sêzut keno, o zoneno taye çî rind û rast nêsonê, coka honde bîyo har.
Eke kewtî tenge vanê ‘endî honde Kurdî poşt polîtîka BDP nêdanê.’
Her weçînîtîs ra avê nîya vanê, hama her weçînîtîs ra dime rîyê xo beno şa. Labelê onca kî arnêkenê.
Vîra xo bîya pirozine. Sawoke Erdoğanî 2005 de Amed de qeseynêkerdo, sawoke ey bi fekê xo mesela qebul nêkerda.
Mezgê sîyasetvan û sermîyananê Tirkî jû hetî ser gureyeno: Peyser û negatîf. Avê û pozîtîf nasnêkeno.
Ebi bomban sîvîlan kisenê, labelê qebul nêkenê. Naye ra dot kî serokwezîro Tirk kistena sîvîlan eskeranê xorê pîroz keno.
Vano ‘eskranê ma na bombardiman de karode rind kerdo.’ Ferman ey bi xo do, coka kî keno pîroz. Hama çîyê xo vîra keno.
Ma de ke mordemê yelçî rusna caye û muxatabî ke wastena muxatabê bînî qebul nêkerde, yelçî peyser rusneno, vano ‘so kamî ke ti rusna cira vaze yelçî cî werdo.’
Bîya na fêndî. Çond reye eskerê Tirkî şî miletê ma başur de kiştî ameyî, hama mesela halnêbîye hata ewro.
Nî yelçîyê peyenî yê Erdoğan kî şi insanê ma kiştî ameyî, hama mesela mende.
Yanê yelçî onca cî werd.