Qedexeyê vejyayîşê teberî ke 11ê Sibate de dewa Nisêbîn Xerabê Bava ronîya rameno. Heyeto ke bi rojano seba şîyayîşê dew paweno yeno manîkerdiş. Parlementera HDP yê Êlihî Ayşe Acar Başaran manîkerdişê şîyayîşê dewî zey îşaretê ‘muameleyê bêhuqûqî’ ameyê ciwîyayîş hesibna.  Xo ra vatişê dewijê Xerabê Bava A.E ke wextê sereştişê dewî de ame binçim girewtiş û 12 rojanê bi îşkenceyanê giran ra tepya serbest veradîya pêrokîn raştîyan rafîna ver çiman.

Parlementera HDP yê Êlihî Ayşe Acar Başaran derheqê qedexeyê vera dewa Xerabê Bava aşkere kerd ke wexto ke dekewtişê sûkekê, herêmekê ya zî dewekê bîro manîkerdiş, o wext yeno fehmkerdiş ke o ca de binlingkerdişê heqan û bêhiqûqî esto.  Ayşe Acar Başaran ke 4 rojî yo hewl dana ke şiro dewa Xerabê Bava yê qezaya Mêrdîn Nisêbîn ard ziwan ke qerarê nê kerdenanê dew de ti qanûnan de çin o. 

‘Heqê manîkerdişê cuya mordeman nêbeno’ 

Başaran vist vîrî ke qerarî fekê tayînan ra vejîyenê û wina dewam kerd: “ Qedexeyê ke yenê îlankerdiş cayê ci qanûna bingeyîna înan de zî çin a. 4 rojî yo ma tiya de pawenê ke heyetê ma şiro dew û çîyo ke ameyo serê dewijan ca de bivîno. Demê OHAL’î de tayî çî yenê manîkerdiş la zerreyê nînan de heqê manîkerdişê cuya mordeman nêşkena bîro manîkerdiş. 

Başaran hayr ant qewîmyayîşanê dewa Xerabê Bava ser û da zonayen ke bi rojan o welatijî nêşkenê bivejyê teber, nêşkenê mordemanê xo bivînê. Parlementera HDP aşkere kerd ke kesê ke dewan de nê kerdenan kenê dê bîrê mahkemekerdiş. 

Herkesî “terorîst” îlan kenê 

Ayşe Acar Başaran ard ziwan ke AKP wazena her kesê ke hemverê xo yê zey “terorîst” îlan bikero û qiseyanê xo bi nê vatenan domna: “Manîkerdişê hemverê ma baş yeno fehmkerdiş. Ma Cizîr ra zanê ka seba çi ma manî kenê û destûr nêdanê ma şirê dew. Wexto ke destûr nêday ke ma şirê Cizîrê ma dî ke qetlîam viraştî. Hikumeta AKP ameya merhaleyeke wina ke her kesî kena dişmenê xo, kena “terorîst”. Nê dewijan zî zey “terorîst" bi name kena. Heta ewro çiwext ke ma rê dekewtişê sûkekî, ya zî dewekî ame manîkerdiş, bin ewja ra bêhiqûqî virazîya.” 

‘Hewcedarîya dewijan bi yardimê walîtî çin o’ 

Parlementera HDP Başaran hayr ant vatenanê Walîtiyê Mêrdînî yê “Ma yardim danê dewijan” ser û da zonayen ke hewcedarîya dewijan bi yardimê walîtî çin o. Başaran aşkere kerd ke wa raya dewî akerê zewbîn dewijî walî ra teba nêwazenê û wina va: “Nê mordemî heywanan warî kenê û debara xo tenya bi warîkerdişê heywanan kenê. Nika vejyayîşê teber qedexe yo û nê dewijî dhe senî bieşkê heywananê xo warî bikerê. Bado ke heywanê înan destê înan ra vejyay, ti maneyê yardim ya zî çîyekê bîn çin o.” 

‘Wa wekîlê AKP bîro ma pîya şirê dew’

Başaran cewab da îzahatê walîtî ke vano, “cuya welatijan taloke de nîya” û wina dewam kerd: “Eke raşt vanê û cuya nê însanan taloke de nîya, wa ray akerê ma çend kesî şirê bivînê. Eke rewşê welatijan rind a ma dê zî bivejyê û îzahatekê bidî. Ma rewşê winayî de propaganda nêkenê, ya raşt çiçîyo ma eyî vanê. Wa parlemeterê AKP yê Mêrdînî bîrê ma pîya şirê dew.” 

AKP amadekarîya referandûmî kena 

Parlementer Başaran herakerdişê qedexeyê dewan zey hemverê xebatanê HDP yê referandûmî hesibna û qiseyanê xo bi nê vatenan qedêna: “Armanca herakerdişê qedexe çiçîyo? Rewşa nêbaş ya ke artêşa tirk kewta wazenê bi nê kerdenanê şarî bixelesnê. AKP seba ke vernîya vengê "Nê" bigîro nê çîyan ferz kena. Heta ke ma seba şîyayîşê dew netîceyekê bigîrê, ma dê hewldayenanê xo biramnê.    




Dewa Talatî welişnay

Dewleta Tirk ke 16 rojîya dewa Nisêbîn Xerabê Bava giroto bin ablûqa, 4 rojîyo zî dewa bîn Talatî de zilmê dewijan kena. Vizêr seatanê şodir de xêlê keyeyê dewa Talatî bi makîneyanê karî xirab kerd. Herzewbîn aw û ceyranê dewe zî birîyayo. 

Dîmenê na wehşeta dewleta Tirk hetê dewijan amê antiş û medya de vila bî. Walîtîyê Mêrdîn ke bi îzahatekê aşkere kerd ke ‘weşîya welatijan bin taloke de nîya” bi dîmenanê wehşeta Talatî zûrker vejîya. 

Xerabê Bava ra dima Talatê

Quwetê lejkerî yê dewleta Tirk, ke no 16 rojîyo dewa Xerabê Bava de wehşet û îşkence ramenê pêrokîn rayê dekewtiş û vatişê dewe girotê. Goreyê vatişê dewijan Tîmanê Teybet îşkence û muameleyê giranî ferzê dewijan kerdî. 

 Wehşetê lejkeranê Tirk bi dewa Xerabê Bava bi sînor nîyo. Dewa bîn yê Nisêbîn Talat zî 4 rojîyo girotîya bin ablûqa û zey serranê 90î keyeyî reyna yenê veşnayîş û welîşnayîş. Lejkerê Tirk hêrîşê dewijan, keye, mal û milkê ci kenê. Vizêr seatanê şodir de xêlê keyeyê dewa Talatî bi makîneyanê karî amey welîşnayîş.  Dîmenê na wehşeta dewleta Tirk hetê dewijan amê antiş û medya de vila bî.  Ceyran û awa dewe zî amê birnayen.   


 DÎHABER / MÊRDÎN