Gerîlaya cinîye Azadî Umute ke çend serrî yo hetê gerîlatîye de karê hunerî zî domnena. Gerîla Azadî Ûmûte dîyar kerde ke înan de şer û huner temîyan de yê û wina dewam kerde: “Êyê ke gure gênê milê xo ser helbet ganî fedakarîya ke înan ra yena waştene zî bigîrê milê xo ser.”

ZEYNEP NERGIZ BOTANE / ANF /  BEHDÎNAN

Tevgerê Azadîya Kurdîstanî mîyan de huner û şer pîya yenî kerdene û her keso ke hunerî reyde mijul beno, eynî wext de şerê azadîye zî dano. Bi no qeyde bi seyan kesê ke winasî estî. Nînan ra yewe zî Azadî Umute ya.

Bi nameyê Azadî Ûmûte de gerîlaya cinîye, panç serrî yo ke beşdarê gerîla bîya. Gerîla Azadî deyîranê Mukerrem Kemertaşe û Musa Erogluyî ra ravêrena bi Aram Tigranî. Dema ke ez pers kena ‘Çira Umut (omid) ?’ aye vana ‘çimkî seba azadîye ganî omidê merdimî nêqedîyo’ û dima ra zî qiseykerdişê xo wina domnena: “Gerîlatîye cuye ya, seba rûmetî şerkerdiş a. Raywanîyêka ver bi xo ya, resayîşê cewherê xo ya.”

Azadî Ûmûte terraqa weşe ra dima bi vengê xo yê tenik û nermî deyîra Aram Tîgranî ya ‘Ax Ax Welat’î vana. Azadîye dima ra qiseykerdişê xo rê wina dewam kena: “Rayberîya ma nîşan daye ke şer bi heme hawayî yeno kerdene. Cuya gerîla huner a, gerîlayî zî hunermendê westa yê. Ez şerwanêk a, la ez do hunerî zî aver berî û wina şerê xo bidomnî.”

Ma de huner û şer temîyan de yê

Gerîla Azadî Ûmûte erjnayîşanê Rayberê Şarê Kurdî Abdullah Ocalanî yê derheqê kultur û hunerî de ramojnena û nê qismî wanena: “Huner fealîyêtêkê şerî yo, bitaybetî zî seba şarêkê sey ma ke mucadeleyê xelesîya neteweyîye dano, huner bi fedakarî û cesarete şerwanêkî yeno kerdene. Eke ma hunerêk rê xirabîye bikerî, o wext seke ma Kurdîstan rê xirabîye kerdo. Ma de huner û şer têmîyan de yê. Ganî hunermendê ma tam bi ruhê şerwanêk kayî kay bikerê, deyîran vajê. Ûca de çîyo ke ê temsîl kenê raştîya ma ya şerî ya, dejê ma yê, xoverdayîşê ma yo û bi hawayêkê pêroyî cuya ma ya şorişgêr a. Êyê ke gure gênê milê xo ser helbet ganî fedakarîya ke înan ra yena waştene zî bigîrê milê xo ser.”

Wa ciwanî wayîrê hunerî bivejyî

Gerîla Azadî Ûmûte qiseykerdişê xo de da zanayene ke huner raştîya xo de fealîyeto tewr gird yê şerî yo zî û wina va: “Bitaybetî ciwanî ganî no donem de wayîrê hunerî yanî wayîrê şorişî bivejyî. Wa ciwanî bizanî ke wayîrvejîyayîşê hunerî, wayîrvejîyayîşê erjanê şarî yo.”

Gerîla Azadî Ûmûte peynîye de çend deyîrî vatî û bi deyîranê xo ma oxir kerde.