Eînsteîn vano; “Bi bikarardişê heman raybazan, encamêko cîya hêvîkerdiş ehmeqî ya.” Dewleta tirka ke nika bîya dewleta KHKyan, nizdê se serrî yo heman ehmeqîyan kena. Peynîya nê ehmeqîyan de rewşa ewroyîne yanê dewleta KHKyan, vecîyaya orte.
Persgiraya kurde de awanbîyişê komare ra heta serranê 80’î wa cayê xo de bo, di çewres serrêy peyênan de heman raybazîy, hetê heme hikumatan ra bi heman gef, helam û propogandayan, amey pêkardiş. Mexsedê hemînan zî bi destvistişê encamêkê cîyayî, serkewteyî bi.
Êrîşê bêvengkerdişî êy verva çapemenîya kurde zî nê raybazanê ke yenê garkkerdişî ra, yew a. Serranê heştayî ra na heta, seba girewtişê çeteleyanê êrîşan û xo newe ra awankerdişê çapemenîya kurdan rê kesêko mirdşit lazim o. Bedêlêy ke di no oxir de ameyê dayîş, tarîxêko bi serreyê xo yo.
Êrîşê dewleta KHKyan yê Erdoganî çi ra ende bêpeym ê? Bombekerdiş û qetilkerdişê bi desan rojnamegeran zî tede, nê raybazîy Erdoganî ra ver zî ameyê pêkardiş. Na raybaze çi encamêka cîya vete orte ke reyna zî yenê cerebnayîş.
Di tarîxê na komare de, Tertelaya Dêrsimî, Qetlîamê Agirî-Zîlan, Qetlîamê Mereşî wehşetê pîl ê. Çîyo ke bajaranê kurdan de hetê Erdoganî ra ame pêkardiş nînan ra kemîyêrî, nîyê. Gelo Erdogan wazeno nînan ra wet, se bikero? No zî îhtîmalêk o la raştîya Şarê Kurdî ya ewroyine, rayîr nêdanê nînan.
Bi goreyê min hîrê çîyê ke bi Erdoganî nînan danê kerdişî est ê.
Ya yewine, bikarardişê şerrê psîkolojîkî yê taybetî yo. Erdoganî bi îddîayêka zaf girde verva Şarê Kurdî êrîş da destpêkerdiş. Di zerre de bi plana “cûmkerdişî” û Rochelato Mîyanên de zî bi bikarardişê DAIŞî, waşt persgiraya kurde bi temamî biqedêno. Na zî bi “heta Menga adare do êdî kes nêşiko behsê PKKyî bikero” bi wezîrê xo da vatişî. Encam, zerre de Erdogan, Rochelato Mîyanên de DAIŞ têk şîy. Kurdîy bîy aktoro sereke.
Heto bîn ra dinya de ameyo tecrîdkerdene. Yew dewletêka doste nêmenda. Îtîbarê dewlete kewto binê lingan. Erdoganî rê serkewtinêko sexte, verapeykerdişê raştîyan û xapênayîşê rayapêroyî hewce yo. No semed ra gere tu vengo ke nêy raştîyan bîyaro ziwan, nêmano.
Ya dîyine, Erdoganî û dormeyê xo, di nê şerrê verva kurdan de sûcê verva merdimayî kerdîy. Nê sûcîy hetê çapemenîya ke êrîş keno ra ameyê tesbîtkerdiş û deşîfrekerdiş. Baş zaneno ke do miheqeq rocêke nê hesabî bido. No ters hewnê Erdoganî remneno. Bi na derûnî, her ke şino zafêrî har beno û êrîş keno. Vengo ke ney sûcanê ey bîyaro ziwanî rê tehemûl nêkeno.
Ya hîrêyine, rojdeme de meselaya kincê yewtîpî yê zîndanan est a. Bi goreyo ke Erdogan û dormeyê xo fikirîyenê do rihet nêbo. Yan zî êy zî zanenê ke do rihet nêbo. La dorêke vato, heta ke bişiko do pêk bîyaro. Na raybaze zî verîya Erdoganî ameya cerebnayiş û bi ser nêkewta. Erdogan seba ke naye pêk bîyaro gere înanê xo ra raver, zafêrî çîyan bikero. Na rewşêka talûke ya. Seba ke na rewşa talûkeyîne di mîyanê bêvengîye de bêro bicaardiş gere çapemenîya muxalîfe û azade nêmano. Êrîşo peyên yê verva çapemenîye, beno ke bi naye zî eleqeder bo.
Peynî de fîl ro daristan qelebîyayo û nêzano kam heta şêro. Geyreno, geyreno yeno heman cayî. Vano na nêbî reyna. Reynayî nêqedîyenê la beno ke Erdogan xo reyde na dewlete zî biqedêno.