Nisêbîn de hêrişê dewlete yê ke bi aşman dewam kerdbî ver bi desan merdimê sîvîlî amebî qetilkerdiş. Hema zî tayê cenazeyê sîvîlan û yê YPSyîyan taxê ke qedexe tede dewam keno de yî. Hêzê dewlete taxê Abdulkadîrpaşa, Firat, Dîcle, Yenîşehîr de rijnayîşê awanîyan domnenî û destûr nêdanî ke cenazeyî taxan ra bêrî vetiş. Çend rojî verê cenazeyêk taxa Fıratî ra ameye vetiş. Serekê Odeyê Tabîpan yê Mêrdînî Zekî Uzunî babete ser o qisey kerd.
Uzunî va ‘netîceyê bombavarnayîşê hêzê dewlete de bajar ame taxrîbkerdiş û wina va: “Sey awanîyan binawanîyê qeza zî ama taxrîbkerdiş. Netîceyê ci de awan şimitişî û yê kanalîzasyonî têmîyan kewena. No zî beno sebebê nêweşîyan. Nika Nisêbîn de nêweşîyê cîddî vila bîyî. Seba ke koçkerdiş esto, domanî nêşkenî bêrî aşikerdiş. Reyna aşiyê diganîyan nêeşkîyeno bêro pirodayîş. Cok ra bi seyan domanî nêweşîyanê cîddîyan reyde rî bi rî yî.”
Ma nêeşkenî xîzmet bidî
Uzunî dewamê qiseykerdişê xo de va ‘Nînan ver ma nêeşkenî xizmetê şarî bikerî’ û wina dewam kerd: “Nisêbîn de duştê merg û welidîyayîşê zêde beno, psîkodînamîkî xirab benî. Nisêbîn de îmkanê resayîşê weşîya merdimî nêmaneno. Hedefê ma yê esasî resayîşê warê weşî yo. Ganî hêzê dewlete şertê ke weşîya merdimî tehdît kenî, orte ra wedarnî. Nê hêriş û rijnayîşan ver heta nika taxanê Abdulkadîrpaşa, Firat, Dîcle û Zeynel Abîdîn ra 12 hezar û 380 keyeyî, temamê Nisêbînî de zî pêro pîya 70 hezar merdimî koç kerdo. Reyna nê taxan de 12 hezar keyeyî û 9 hezar zî cayê karî ameyî rijnayîş. Hûmara birîndaran bi hezaran derbaz kerdo. Mabênê 300 û 500 de kesî merdî.”
Destûr nêdayîş sûcê merdimîye yo
Uzunî peynîya qiseykerdişê xo de wina va: “Taxan ra girewtişê cenazeyan yeno astengkerdiş û no zî çîyêko skandal o. Hêzê dewlete bi rijnayîşan sucê merdimîye kenî. No bes nîyo, na rey zî seba girewtişê cenazeyan destûr nîno dayîş û keyeyî ser cenazeyan de yenî rijnayîş. Ganî dewlete bi hawayo lez nê sucê merdimîye biqedêno.”
SEDAT SÛR 7/ ANF / MÊRDÎN