Partîyê sîyasî seba weçînayîşê herêmî xebatanê xo yê weçînayîşî dayî destpêkerdene. Hetê ci de namzedan seba muxtarîye zî dest bi muracatan kerdî. Nê namzedan ra yewe zî cinîya bi nameyê Pelîn Gungorena ke qezaya Mazgêrdî ya Dêrsimî de cuyena ya.
Gungorene seba taxa Eltîhatuna Corêne namzedîya xo ronaya û qeza de namzeda sifteyîne ya cinî ya û tewr zaf hetê cinîyan ra yena destekkerdene. Gungorene daya zanayene ke weçînayîşî amancêk nê, haletêk î û wina dewam kerde: “Cok ra mi muracat kerd. Mi waşt ez problemanê cinîyan bîyara ziwan û biba vengê cinîyan.”
Gungorene va ‘cinîyî her warê cuye de bi keda xo estî’ û wina domnaye: “Labelê heqê qiseykerdişê cinîyan çin o. Herçiqas ke cinîyî her roje cuye îdare kenî zî, hetê sîyasî de hertim pey de yenî verdayene. Heta ke ma kede nêdî, rojê rindî do bi xo nêrî. Ma qezayêka şenike de cuyenî. Labelê sey her cayî, tîya de zî problemê girdî yenî cuyayene. Kerrayêk reyde banêk nêbeno, eke heme kerrayî bêrî têhet o wext merdim eşkeno banêko rind bivirazo. Eke ma cinîyî bêrî têhet, o wext ma eşkenî qezaya xo hîna rind bikerî.”
JINNEWS / DÊRSIM