Yew weçînayîş vernîyê kurdan de aseno. No weçînayîş referandume qanuna bingehîn o. No weçînayîş, weçînayîşêk muhîm o. Çunke çîyo ke dewleta tirk û AKP heta nika waştênê bikerenê pê nê weçînayîş wazenê mohr bikerênê.
Dewleta tirk ver xoverdayîşê şarê kurdî amebî yew merhalê ke yaw raver de gam bieştênê yan zî tepîya gam bieştênê. AKP û dewleta tirk raver de gam bieştênê do estbîyayîşê şarê kurdî qebûlbikerdenê. Qanunêk bingehîn yê demokratîk hadre bikerdênê. Gamek hina eştiş gore bîyayîşê dewleta tirk mumkin nîbi. Çunke dewleta tirk ser çinkerdişê şarê kurdî ameya awankerdiş. Wexto ke estbîyayîşê şarê kurdî qebûl bikero, meqseda estbîyayîşê xo ra fek verêdana. U çaxî Komara Tirkîye û tirkbîyayîş nêmeneno. Xora tirbîyayîşê çîyêk sunî yo. Yane çîyêk viraşte yo. Seba nayî hezar nê mîlyon serrî şêro zî AKP û dewleta tirk ser estbîyayîşê şarê kurdî yew gam zî nêerzênê. Hetanê qirkerdişê şarê kurdî de serbikewrenê do şerê şarê kurdî bikerênê. Serkewnê sernêkewnê meselayêk bîna. La meqseda AKP û dewleta tirk aya ke şarê kurd tarîx ra weder o.
Vernîyê AKP û dewleta tirk rayîra bîna a bi kî rejimê faşîst hîna bikero faşîst. Hîna bikero tirkperest. Çîyo ke AKP nika kena ina yo. No çi tena AKP nîkena. Planê şirîk ayê AKP,CHP û MHP yo. Planê şirîk ayê Erdogan,Bahçelî û Kiliçdaroglu yo. Xora Kemal Kiliçdaroglu û Dewlet Bahçelî hevalê yewbînî. Pîya yew mekteb de wend o. Kiliçdaroglu, hetê Îhsan Sabrî Çaglîyangîl ra bi taybet ameyo weykerdiş. Kadroyêk taybet ayê dewleta tirkî yo. Bi taybet zî ser CHP ameyo wezîfekerdiş. Qey Kurdê Elewî bianco mîyanê CHP û bikero tirk gure girewto.
Dima ra zî seba ke wekîlên HDP bêrênê tepiştiş û bikerênê hepîsxaneyan qanuna bingehîn de reyê xo û yê AKP kerd yew. Reyna seba ke rewşa awerte awanbibo destet da AKP. Yane Erdogan û AKP hêzbîyayîşê xo Kiliçdaroglu ra girewt.
Erdogan û Kiliçdaroglu pîya wazênê Tirkîye de sîsteme di partîya bibo. Yane AKP û CHP tena bimane. Xora MHP bîya AKP, AKP bîya MHP. Her di partî bîyê yew partî.
Nika zî pê bedilnayîşê 18 madeyan wazenê rewşê awartê bikerênê rewşê qanunî. Hetê sîyasî û demokratîk de vernîyê şarê kurd bigerênê. Seba nayî wazenê wexto ke kilmek de ser 18 madeyan referandum bivirazênê. Îhtîmalêk gird de aşme nîsanê de weçînayîş bibo. Ser nê weçînayîş HDP senî hereket bikero, fikre xo eşkera kerd.
HDP vana ma vanî nê. Qerarêk hina qerarêk raşt o. Kurdistan beno teberê Kurdistan sey Ewropa beno, şarê kurd şêro ser sindoqan “nê” mohrbikero.
Vajo, nê, nê , nê.
Nê de xeyr esto.