Xespbîyayîş û qayûmtayînbîyayîşê şaredarîyanê Amed, Wan û Mêrdînî ra dima 19ê Tebaxe ra nata çalakîya Nobeta Demokrasî dewam kena. Çalakîyê ke Amed, Wan û Mêrdînî de dewam kenî, roja 32. de dewam kenî.
Çalakîya roniştişî ke vernîya awanîya rêxistina qezaya Rayîrê Îpegî ya bajarê Wanî de virazîyena, dewam kena. Çalakîye de pankarto ke ‘îradeya qayûmî nê, îradeya şarî’ ame akerdene û dovîzê ‘Jin jiyan azadî’, ‘hemserekîye xeta ma ya more ya’ û sewbîna ameyî kiriştene.
Parlamenterê HDPyî yê Wanî Mûrat Sarisaç, Parlamenterê HDPyî yê Antalya Kemal Bulbul, hemserekê HDPyî yê bajar û qezayan, endamê Meclîsê Dayîkê Aştîye yê Wanî, aktîvîstê TJA û sewbîna xeylê kesî beşdarê çalakîye bîyî. Parlamenter Sarisaçî çalakîye de qisey kerd û dîyar kerd ke nê çalakîyî do dewam bikerî û va ‘se beno wa bibo têkoşînê ma do dewam bikero’. Çalakîye bi siloganan qedîyaye.
JINNEWS / WAN