Tepişteyanê dawa PKK û PAJKî 15ê Sibate de hepisxaneyê Şakran û çendê bînan de grevê vêşanî daybî destpêkerdiş. Her ke şono bi beşdarbîyayîşê tepişteyanê neweyan grev hîra beno. Babete ser o ser nameyê hepsîyanê PKK û PAJKî Denîz Kayayî îzehetêko nuştekî da.
Kayayî îzehetê xo de va ‘îqtîdarê AKPyî ke nêwazeno probleman çareser bikero, hewl dano faşîzmî aver bîşêro û şarê kurdî mehkumê bêstatuyî bikero’ û wina va: “AKPyhewl dano çîyo ke teber de keno, bikirêşo hepisxaneyan û bi operasyonanê teslîmgirewtişî bireso hedefê xo. Cok ra hêrişê ke rûmetê merdimî hedef gênî, yenî kerdiş. Heme hepisxaneyan de neheqî û zextî estî.”
Ma rolê xo zanî
Kayayî dewamê îzehetê xo de wina va: “Cok ra vera hêrişanê topyekunan de ma zî xoverdayîşê topyekunî esas gênî. Cok ra ma do surgin, zext û hêrişan sey mehne nêvînî û her vîsta xo seba awankerdişê cuya azade bixebetnî. Hepisxaneyê T 4 yê Şakranî de cuye kerdî cehenem. Sehnayîşo hîra, payan ser de hûmare dayîş, korîdoran de bi hawayo rêzkî meşîyayîş, aliqnayîşê nasnameyê hepsî û sewbîna çîyê ke bêrûmetî ser hepsî û keyeyanê hepsîyan de ferz kenî, estî. Reyna têkilîya embazê ke tîya de yî, yeno astengkerdiş.”
Destpêkêko newe
Kayayî îzehetê xo de veng da rêxistinanê sîvîlan û wina va: “Ma vanî wa çîyê ke hepisxaneyan de qewimîyenî ser o bivinderî. Ewro grevê vêşanî hepisxaneyan de dewam keno. Ma zanî ke tecrîdo ke Rayberê ma ser de yeno meşnayîş, merkezê heme hêrişan de yo. Cok ra heme çîyî ra ver ganî tecrîd bêro wedarnayîş. Sîstem wazeno şarê ma bianco tehlukeyê mergî, cok ra vatişê ‘nê’ do bibo destpêkê şiknayîşê hêrişan. Proseso ke ma tede yî, ganî ma nîşan bidî ke ma taqîpkarê Mazlum, Kemal û Ferhatan î. Do bi tesilî serkewtiş yê xoverdakaran bo.”
Wa heme şarî rê pîroz bo
Heto bîn ra Denîz Kayayî derheqê 4ê Nîsane zî mektubêk erşawit. Dêstpêkê mektube de nuşteyê ‘Wa roja şewqe, mana û azadîye pîroz bo’ ameyo nuştiş û dewamê mektube de wina ameyo vatiş: “Ma rojbîyayîşê Rayberîya xo, şert û mercanê tecrîd û hêrişan de pêşwazî kenî. Estena Rayberîye seba ma mucîzeyêk a, Cok ra wexto ke ma bê Rayberîye Kurdistan fikirîyenî, ma zehmetîya ci hîna baş fam kenî. Eke Rayberîye nêbîyêne, dinya do seba ma bibîyêne cayêko bêrûmetî, bêazadî û bêkede. Cok ra welidîyayîşê Rayberîya ma, welidîyayîşê ma yo. Wa welidîyayîşê Rayberîye heme şaran rê pîroz bo!”
ANF/BRUKSEL