Amed de demê peyênan de kesê ke nasnameyê înan dîyar nîyî û destê înan de sîlehê luledergî estî, sîvîlan remnenî bi hawayo bêqanûnî înan muhakeme kenî. Karmend Kamîl Açar 18ê Temmuze de wexto ke Riha ra ameyêne Amed, rayîr ser o amebî remnayîş û 2 rojî ra dima amebi keyeyê xo. Reyna keso bi nameyê Ç.M zî dîyar kerdbi ke sey Açarî ameyo remnayene û cayêko nîno zanayene de ameyo tehdît kerdene. Babete ser o Serekê Komeleya Heqê Merdiman (ÎHD) ya Şûbeya Amedî avûkat Abdullah Zeytunî qisey kerd. Zeytunî va ‘remnayîşî serranê 90î manenî’ û wina domna: “Wexto ke ma muracatan ra ewnîyenî, ma vînenî ke yew a yew ê wextan manenî. Nê hedîseyî nîşan danî ke ewleyîya huqûqî çin a.” Eke walîyî biwazî heme çî eşkenî bikerî Zeytunî dewamê qiseykerdişê xo de qala hetkarîye dayîşê welatîyan kerd û wina va: “Ewro qanûnê ke selahîyetê neweyan danî walîyan, ameyî vetene. Eke walîyî biwazî heme çî eşkenî bikerî. Yeno vatene ke OHAL wedarîyayo, labelê tena name ameyo bedilnayene. Raştîya xo de qanûnê OHALî kewtî qanûnê bingeyî mîyan. Hêzê ewleyîye baş zanî ke nînî mehkeme kerdene û no zî cesaret dano înan. Wexto ke çîyê winasî qewimîyayî, wa welatîyî muracatê ma bikerî. Ma sey komele her tewir hetkarîye rê amade yî. Wa welatîyî vera çîyanê winasîyan de ma ra hetkarîye biwazî.”  MA/AMED