Endamê polîtburoya Partiya Zehmetkêşên Kurdistanê Dr. Hîwa Seyîd Selîm derbarê serdana serokê Herêma Federal a Kurdistanê Mesûd Barzanî ya ji bo Amedê û taloqkirina Kongreya Neteweyî ya Kurd ji DÎHA’yê re axivî. Selîm derbarê serdana Barzanî ya ji bo Amedê wiha got: “Di navbera Herêma Kurdistanê û Tirkiyê de peywendiyekî fermî heye. Hatina serokwezîrê Tirkiyê ya ji bo Hewlêr û serdana serokê Herêma Kurdistanê ji bo Amedê.  Alîgirên AKP’ê bi vî serdanê keyfxweş in, bi baweriya wan ev serdan wê bibe despêkêk ji bo xortkirina peywendiyên aborî yên navbera Herêma Kurdistan û dewleta Tirkiyê de. Lê ji aliyê gel, xelkê Kurdistan û rûniştvanên Amedê bi hestyarî reftar ligel serdana Barzanî tê kirin.” Dr. Hîwa wiha got: “Berî niha BDP’ê bi awayek fermî Barzanî ji bo Newroza Amedê vexwend, lê neçû. Niha serokê Herêma Kurdistanê li ser vexwendina fermî ya AKP û serokwezîrê Tirkiyê, li wir bi hev re hevdîtinê dikin. Gelê Kurd jî fikaran dike..


‘Divê ne ji bo hilbijartinan be’
Dr. Hîwa da zanîn ku dema serdana Barzanî ya ji bo Amedê pir hestyar e û got: “Em dizanin meha adara were li Tirkiyê hilbijartina şaredariyan heye. Em hêvîdarin ku aliyên Tirkiyê û AKP serdana birêz Barzanî wekî reklamek ji bo AKP’ê neyê bikarnanîn. Divê Barzanî serdana BDP û şaredariyê jî bike. Berî çend rojan li Herêma Federal a Kurdistanê bi beşdariya piraniya partiyan belavokek hat belavkirin û tê de daxwaz hat kirin ku Desteya Bilind a Kurd (DBK) di kongreya Cenevre 2 de nûnertiya Kurdên li Rojava bike.  Di vê derbarê de edamê polîtburoya Zehmetkêşan wiha got: “Desteya Bilind a Kurd (DBK) bi amadebûna serokê Herêma Kurdistanê li Hewlêrê hat ragihandin. Hemû aliyên Rojavayê Kurdistanê di nava wê civatê de hene. Raste niha di navbera ENKS û EGRK’ê de hinek sarbûn heye. Hinek dewlet û bi taybet jî Tirkiye dixwaze beşek ji aliyên di nava DBK’ê de beşdarî kongreya Cenevre 2 bike.”

Tenê DBK dikare nûnertiya Rojava bike

Di vê derbarê de Dr. Hîwa wiha dirêjî da axaftinên xwe: “Kongreya Neteweyî ya Kurd (KNK) daxwazek pêşkêşî partî û aliyên siyasî yên başûrê Kurdistanê kir ku DBK di Cenevre 2 de nûnertiya Rojava bike. Em wekî Partiya Zehmetkêşên Kurdistanê wê daxwazê rewa dibînin û piştgiriyê dikin. Tenê DBK dikare nûnertiya Rojava bike. Nabe ti hêzekî siyasî û bi çi navekî din civînan boykot bike û me jî piştgirî da vê yekê.”

Daxuyanî xizmeta Rojava nake
Dr. Hîwa li ser nakokiyên navbera PYD, hikûmeta Herêma Federal a Kurdistanê û daxuyaniya Barzanî ya derbarê Rojava de ku gotibû li Rojava ti şoreşek nîne û rejîma Sûriyê hinek navçe radestî PYD’ê kirine nerazîbûn nîşanda û xwest ku bi baweriya me daxuyaniyên bi vî awayî xizmeta gelê Kurd, tevgera siyasî ya Kurd û rewşa niha ya li Rojava nake.  Endamê polîtburoya Partiya Zehmetkêşan pêşniyarên xwe yên ji bo çareserkirina pirsgirêkan rêz kir û wiha ragihand: “ Tekane çareserî lidarxistina Kongreya Netewiye. Ger kongreya netewî di dema xwe de û berî hilbijartinên Herêma Kurdistanê hatiban lidarxistin, pirsgirêkên niha hene wê hêsantir hatiban çareserkirin. Mixabin çend caran kongreya neteweyî tê taloqkirin..

NÎHAT KAYA/MÎHEMED TAHİR / DÎHA/HEWLÊR 



Serdana Barzanî ne ji bo doza kurd e

Endameke polîtburoya Yekîtîtiya Nîştîmaniya Kurdistanê (YNK) derbarê serdana serokê Herêma Federal ê Kurdistanê Mesûd Barzanî ya ji bo Amedê ragihand ku serdana wî bazirganiye û ne ji bo doza kurd e. Endama polîtburoya YNK’ê Wesfiye Benî Weys derbarê serdana Barzanî ya ji bo Amedê destnîşan kir ku qasî serdana Barzanî wekî serdanekî bazirganî û hizbiye, nîvê wê jî bi qasî çareseriya pirsa kurd û doza kurd naçe.” Wesfiye Benî Weys li ser rûpelê xwe yê taybet ê Tora Civakî Facebookê nivîsek li ser serdana Barzanî ya ji bo Amedê belav kir û wiha dibêje: “Xwezî min tenê carekê dîtiban ev mêrik wekî serokê Herêma Kurdistanê, dûrî mantiqê hizbî û malbatî reftar kiriban.”