Serekkomar Erdogan û AKP peynîya weçînayişê 7’ê hezîrane têk şîbî, no têkşîyîşê ser zî AKP û Erdogan bi hembarî ravêreyeya çareserîye xirab kerdî, xirabkerdişê ravêreyeya çareserî zî waştiş kurdan a xoserî nişan dayî û dijî şarê kurd zî dest pê şerî kerdî.
Xoserî azadî ya
Taybetê nê di dorûverê şerwaşt, waştişê kurdan a xoserî zey hinceta şerî mojnenî û ser kurdan polîtîkayê terteleyî şuxulnenî. Hetanê waştişê kurdan a ‘xoser û xorayîrberdiş’ de 8 hemserek bi îdiaya ‘Rijnayişê dewlete’ amey girewtiş û wezîfeyî ra zî amey girewtiş.
Çi heyf ke no şerîwaştî dewleta tirk û AKPe ra zî çapemenîya tirk zî bi manşetê xo hetkarî danî û şarê tirk ra xoserî û xorayîrberdiş zey cîyabîyîş û letebîyîş mojnenî labelê waştişê kurdan de qet letebîyîş çino, tena kurdan wazenê xo bi xo averberî û problemê xo ra xo bi xo çareserî bivînî, heremê xo de zî wazenê azad bicu.
Neqepan ra xoserî
Nika vejîya ke demo vîyarteye de neqepê Tirkîyaye Çanakkale û Stenbolî ra zî waştişê ‘xoserî’ ameyo rojdemî. Ewro çapemenîya tirk waştişê kurdan a xoserî û xorayîrberdiş zey waştişê marjînal nişan danî û taybetê no polîtîkayî de tewr gird rol rojnameya Mîllîyet kay keno la nika vejîya meydan ke eynî rojname 3’ê citmenga 1997’an de manşetê ‘Neqepan ra xoserî’ reyde waştişê xoserî servîs kerda.
Xeber de yena vatiş ke sermayedar Rahmî Koç vato ke êdî nika ra pey îdareya Neqepê Stenbol û Çanakkaleye sazîyeka taybet nê rayedarîyek xoser îdare bikera û bi na xebere zî rojdemê Tirkîyaye ra waştişê xoserî yeno. Hewna komeleya Rahmî Koçî TURMEPA zî serra 1994’ê de neqepan ra xoserî wazena û eynî komela serra 1997’an de seba neqepan projeya xoserî aşkera kena.
Her sareyî ra yew veng vejîyeno, xoserî şert o
Seba proje zî Rahmî Koç mulakatê xo ya rojnameya Mîllîyet de wina vano: “Êdî îdareya neqepê Stenbol û Çanakkaleye binê yew îdareye de kom biba, ma zî seba na projeye xebeta xo aver benî. Na babete zaf bi muhîm a, çimkî nika zaf hûmarîy de kesî viyartişê neqepan ra mudaxale kena, her sareyî ra yew veng vejîyeno, êdî ma sazgeheke taybet nêwazenî, ma sazgeheke xoser wazenî.”