Labelê roja ke şoriş dest pê kerdo ra heta eyro dewleta tirk qet azadbîyîşê Rojawanî hezm nêkerdo û hêrişê Rojawanî kerdo. Endamê Heyetê Îdareya Qamişloye ya Yewitîya Ciwanê Rojawan (YCR) Erdal Şahîn derheqê hêrişê dewleta tirk a Rojawanî sero qalîkerd.
Mîyanê tifaqî de yî
Şahîn ciresna ke dewleta tirk awayo akerde paştî dana DAIŞe û wina vat: “Xoverdayîşê Kobanêye de şarî qir kerdî û nêyî ra sînordar nêmendî, hêrişê şarê Kurdistano Vakurî zî kerdî. Erdogan-DAIŞ her tim mîyanê tifaqî de yî, wayîrê heman zîhnîyet î. Xora ser DAIŞijê ke amey kîştiş de kamîya dewleta tirk vejyay. Tewr peynî zî Erdogan vejya ma ra gef werd. Wa çew ma ra gef nêwiro; çimkî ma erdê xo pawenî. Wirdî hetê çemê Firatî zî erdê ma yî. Ger ke Erdogan hetê erdî de hesas o se qey mudaxaleyê erdê ma keno?”
Azadî zaf nêzdî yo
Şahîn qalîkerdişê xo de xorayîrberdişê ke ameyî îlankerdiş silam kerd û wina domna: “Erdogan û AKP bi her çekê ke destê înan de hêrişê Kurdistano Vakurî kenî. Çew nêeşkeno îradeya şarî bişikno; şar wazeno xo bi xo, xo rayîr bîşêro. Şarê vakurî senî ke Kobanêye ra wayîr vejyayo se, ma zî nika semedê Cizîr, Farqîn, Silopî, Amed û sewbîna, veng danî ciwanan wa wayîrê nêy cayan bivejî.”
Şahîn peynîya qalîkerdişê xo de wina vat: “Êy ke Şengal pawitî hêzê HPG û YBŞ yî. PDK bi destê xo Şengalî teslîmî çeteyan kerd. PDK heta nika qet hetê şarî de ca nêgirewta. Nika vanî ma Şengalî azad kerdo; PDK mîyanê xeyalî de cuyena. No semedî ra zî PDK îradeya şarê Şengalî nîya.”