Wezîra Karê Teberî ya Swedî Margot Wallstrome zî netîceyê referandûmî rê nêrazîbîyayîş damûsna û va ‘eke sîyasetmedarê muxalîfî hepisxaneyan de nêbîyênê, do se bibîyêne.
Wallstrome vist vîrî ke eke tewqîfkerde nêbîyênê o wext do netîceyêko bîn bivejîyayêne û wina va: “Bajaranê girdan de ya nêvejîya û no zî seba Erdoganî têkşîyayîşo ke gird o.” Wallstromî bale ante raporê Teşkîlatê Hemkarî û Ewleyîya Ewropa (AGÎT) ser û wina va: “Hukmatê Tirkî ortaxo stratejîk yê Yewîya Ewropa yo; cok ra ganî rêz nîşanê heqê merdiman bido.
Visto bin lingan
Verfekê Polîtîkaya Teberî yê Partî Bîrgîtta Ohlssonî zî wina va: “Netîceyo ke referandûmî de vejîya ver merdim xemgîn beno; çimkî Erdoganî bi serran o ke demokrasî visto bin lingan. Netîceyê referandûmî pêvînayîşanê Yewîya Ewropa û Tirkîya bêîmkan kerdo. Erdoganî qala îdamî kerd; ti welatê endamê Yewîya Ewropa îdam û îşkenceyî nêwazeno. Ma vînenî ke Erdogan senî hêrişê azadîya îfadeyî keno.Serekê Enstîtuyê Cigêrayîşê Tirkîya yê Unîversîteya Stockholmî Paul Lewînî zî va ‘referandûm mîyanê şarî de parçebîyayîş viraşto.’
2 mîlyon û nîme reyî bi şaîbe yê?
Heto bîn ra, Endama AGÎTî Alev Korune va ‘2 mîlyon û nîme reyan de şaîbe esto’ û wina domna: “No het de şik esto. Sebebê nêyî o yo ke qanûnî destûr danî zerfanê fermîyan. Labelê Heyetê Weçînayîşî yê Berzî (YSK) zerfanê bêmoran qebul kerd.” AGÎT çarçeweya prosesê Endamîya YE de bi serran o weçînayîşê Tirkîya rê heyet erşaweno.
MÛRAT KUSEYRÎANF/STOCKHOLM