Tarîxê 6 û 7ê teşrîna verêne de bajarê Frankfurtî yê Almanya de Konferansê Cinîyanê Mîyanneteweyî yê 1. ame viraştene. Welatanê cîya-cîyayan ra nizdîyê 500 cinîyî beşdarê konferansî bîyî. Cinîyan konferans ra dima vilaweka netîceyê konferansî aşkere kerd û vilaweke de ca dîyayo xeylê babetanê muhîman.
Vilaweka netîceyê konferansî de ameyo vatene ke ‘çarçewaya şero unîversal ke vera cinîyan de yeno domnayene de qezencê cinîyan yenî hedef girewtene’ û wina dewam kerdo: “Ma do hêz û azadîya xo tepîya bigîrî. Nîjadperestî, dagîrkerîye, kapîtalîzm û zîhnîyetê camêrdî hetanê cîya-cîyayan ra îttîfaqan virazenî. Nê îttîfaqî şexsê Erdogan, Duterte, Mondî, Putîn û Trumpî de vejîyenî aver. Heme cayê dinya de kapîtalîstê ke keda cinîyan dagîr kenî, estî.”
Dewamê vilaweke de wina ameyo vatene: “Ma xeylê cayanê dinya ra ameyî û Frankfurt de resayî yewbînan. Ma 2 rojî ameyoxa cinîyan ser o munaqeşe kerd. Goreyê netîceyê konferansî, ganî ma xo rêxistine bikerî û dest bi awankerdişê Konfederalîzmê Demokratîke yê Dinya yê Cinîyan bikerî. Ma do no konferans bikerî gama sifteyîne. Ma tîya ra beyan kenî ke ma do têkoşînê xo pîya bidomnî. Ma wazenî ke cuya ma azade biba.”
JINNEWS / AMED