Badê ke netîceyê referandûmê 16ê Nîsane de se ra 51 ya vejîya, munaqeşeyê ke derheqê referandûmî de yenî kerdiş, domîyenî. Sere de cinîyî û nîmeyê Tirkîya ke vatbî nê, bi hezaran kesî îtîrazê netîceyê referandûmî kenî. Babete ser o Akademîsyenanê ke îmze eştbî binê vilaweka aştîye ra Prof. Dr. Melek Goregenlîye qisey kerde.
Goregenlîye qiseykerdişê xo de va ‘ma azadîya xoîfadekerdişî sey warêko muhîm yê azadî vînenî û kesê ke wayîrê xusûsîyetê winasî bibî, nê kesî nêbenî otorîter. Labelê tayê kesê ke ma înan ra vanî ‘welatperwero nêzan’ estî û ê ti şert û mercan de welatê xo rexne nêkenî. Nê ke kesê ke hetê azadîya xoîfadekerdişî de ca gênî welatperwer nîyî û welatê xo ra hes nêkenî. Labelê bi hawayo rexneker nizdîyê welatê xo benî. Nêyî eynî wext de cînsîyetperest û homofobîk nîyî. Labelê wexto ke ma kesê ke çepê înan de yî ser o bifikirî, ma vînenî ke nêyî nîjadperest, homofobîk û cînsîyetperest î.”
Cesaret bi bedelanê giranan yeno cezakerdiş
Nêpadenî la nêdanî xebetnayîş Goregenlîye dewamê qiseykerdişê xo de wina va: “Cayo ke tede kesê ke cesaretin î tay bibî, ewja de cesaret bi bedelanê giranan yeno cezakerdiş. Sey îmzekarê vilaweka aştîye, bedelo ke ma dayî mi rê zaf giran nîno. Çimkî ma cayo ke merdimî tede kişîyenî, banê înan sereyê înan ser de rijîyenî û heqê înan yê esasî destê înan ra yenî girewtiş de cuyenî. Rojnameger û serekê partîyan zîndanan de yî. Nika partîyê kurdan nînî padayîş, labelê wina kenî ke nêşênî kar bikerî. No raybazêko newe yo.”Goregenlîye peynîya qiseykerdişê xo de va ‘netîceyê referandûmî hêvî dano merdimî’ û wina qedênaye: “Ma vînenî ke her ke şono ciwanî êdî bawerîya xo hîkayeya ke yena vatiş ra nêanî. Her ke şono haya cinîyan zî heme çîyan ra bena.”
ŞÛJIN/ÎZMÎR