SONYA BAYIK / ESRA SOLÎN DAL / MA / AMED
Newala Dîcle herême de warê cuyayîşî mîyanê xo de xeylê tewir gandar û nebatan hewênena. Labelê nê warê cuyayîşî bi viraştişê barajî ver her ke şono ver bi betonbîyayîşî şona.
Na newale 2015 de hetê
UNESCOye ra girîyayî lîsteya Mîrasê Kulturî yê Dinya. Labelê heta nika seba pawitişê newale çîyêk nêameyo kerdiş. Bitaybetî pêrodayîşê peyênan ra dima newale betonbîyayîşî rê abîye. Tewr peynî yeno zanayîş lêminbîyayîşê awe ver Pirdo Desçimin de bi hezaran maseyî merdbî. Heto bîn ra Heskîf zî viraştişê barajî ver çinî beno.
Babete ser Doçento Hetkar
Zekî Kanayo ke Unîversîteya Dîcle ra amebî îxraçkerdiş, qisey kerd. Kanayî va ‘rewşa Newala Dîcle zerrîya merdimî dejnena. Eke bi hawayo raşt bigirîyayêne dest, ewro no çem tena Tirkîya de nê, dinya de bîyêne cayêko merkezî. Ewro Îdareyê Unîversîteya Dîcle xeylê polîtîkayê ke betonbîyayîş û bêdar verdanî, eştî dewre û no zî beno sebeb ke gandarî çinî bibî.”
Eke ma nêpawî, ti kes nêpaweno
Kanayî dewamê qiseykerdişê xo de wina va: “Ganî ma têkoşînê xo hîna zêde bikerî. Eke ma bibîyêne yewe û fam bikerdêne, ewro Newala Dîcle wina nêbîyêne. Eke ma nêpawî, ti kes nêpaweno. Ganî ma bawerîya xo UNESCOye rê nîyarî. Tîya de polîtîkayê cîyayî estî. Newala Dîcle de 51 tewir maseyî estî, labelê nê tewirî viraştişê barajî ver tehluke de yî. Reyna projeyê rantî erzîyenî dewre. Seba Newala Dîcle hertim hêvîyêk esta.”