No konseptê şerî sero bi desan polîs, lejker û gerîla cuyeyê xo vînî kerd. Maya lejkerî Gulîstan Erek no şerî sero qalî kerd û ard ziwan ke ciwanîy semedê AKP û qesrî yenî qurbankerdiş û wina vat: “Serekkomar Erdogan hemverê heme kesêy ke rayê xo dayo HDPe şer dayo destpêkerdiş. Her ca dekerdo mîyanê adirî û no adirî de bêxra êy herkes veşeno. Labelê nêzano ke no adir do êy zî biveşno. Semedê çi domanê êy lejkerî de nîyo?”
‘Lejker û polîsê min!’
Erek dergeyîya qalîkerdişê xo de ard ziwan ke vatişê ‘Lejkerê min, polîsê min’ fekê Erdoganî ra nêkewenî û wina domna: “Timak hende lejker û polîsan ra hes keno aye wext semedê çi domanê êy polîs an zî lejker nêbeno? Semedê çi domanê êy raporê helesnaye girewt û kerdişê lejkerî ra xo xelesna? Erdogan bêxra domanê xo domananê ti kesî sey doman nêveyneno. Ma heta nika zaf bedel dayî, êdî bes o, ma şer nêwazenîy.”
Kam do hesab bido
Erek ciresna ke êy canê înan veşeno mayê kurd î û qalîkerdişê xo wina domna: “Domanê min nika lejkerî de yo. Ger ke yew çî bêro sereyê ci kam do hesabê ci bido. Ez nêwazena ke domanê min qesra Erdoganî sero bimiro û bibo qurbanê qoltuxa yewî. Min domanê xo new aşme pîzeyê xo de kirişt. Min nêwerd û nêşimit min da domanê xo. Erdogan vano ke; ‘Êy ke domanê ci şehîd keweno zaf bextîyar o’ la kurayê ci bextewarî yo. Wexto ke min domanê xo vinî kerd welat weş bîyo nêbîyo, manaya ci çîyo?” Erek tewr peynî wina vat: “Na semed ra ez veng dana heme mayan wa destê xo dergeyî yewnan bikerî û ma semedê domananê xo bibî sîper.”