Kürdistan bi rojano açarniya rengê newrozî. Açarniya rengê îsyan, xoverdayiş û rihê azadî. Endî Newroz tenya zey roşanî bimbarek nêbenê, herzewbîn bi mesajê dekerde yê tarixî ravêrenê. 

Newroza emserr zî serva-qandê Şarê Kurd û şaranê Tirkiyeyî tarixî ya. 

Kurdistanijî Newrozê emserr zey ‘Newrozê Öcalan’î rê Serbestî’ bimbarek kenê û hedef kenê ke na serr serva rayverê xo û şaran bikerê serra serbestî. Ewro reyna-fina çimê ma serr Rayver Öcalan’î de rê. Ewro Îmrali ra onca mesajê da mihîm yena û bi na mesaj ra tepya qonaxê newî destpa keno. 2013’î de Rayver Öcalan’î Newroza Amedî manîfestoyê ‘xelesnayişê demokratîk ronayişê ciwyana azad’ aşkere kerd. Serva çarekerdinê meseleya Kurd û demokratîkbiyînê Tirkiye na hemleyê da mihîm bî. Na hemleya Rayver Apo’yî pêrokîn polîtîka û îtifaqanê qilerîn yê qûwetanê serdest veng vet. Bi na hemle ra piya Tirkiye de qonaxê newî abiya. Manîfestoyê 2013’î ra tepya bi pêdiyayinê heyetê dewlet bi Rayver Öcalan’î ra dewam kerdî û resyay merhaleyê muzakere.

Her çi qe dewleta AKP polîtîkayanê înkar, asîmîlasyon û xapînayiş de israr bikero zî destpakerdişê muzakereyan û Rayver Öcalan’î serva çarekerdişê mesele zey muxetab girotiş îşaretê welişnayişê dêsanê dewlet keno. Zewbîn zî ispat bi ke bê Tirkiye û Kurdistanî rê haştî û serbestî do bi rayverîna Öcalan’î bîro. Çi ke Rayver Öcalan bi siyaset, hemle û stratejîyê raşt bi mîmarê çarekerdin û haştî. Çi ke Rayver Öcalan’î pêrokîn emrê xo na ray de feda kerd. 

Çewres serriyo Rayver Öcalan pey heqîqeta şaran de yo. Merdiş, tepiştiş, komplo her çî girot ver çiman û raya heqîqet ra nê ageyra. Kancî lîder wina-niya keno? Kancî lîder serva menfaatê şarî ganê xo ra dest viradano. Cok ra şar sloganê “bê serok ciwyan nêbeno” berz keno. Çi ke Rayver Öcalan’î şarê Kurd merdiş ra weriştna pay. Fina ra gonî da, rih da, zanayiş da û ganî kerd. Çi ke Rayver Öcalan’î siyasetê se serran yê dewletan xeripna. Çi ke Rayver Öcalan’î bi hemleyanê raşt verniya herbê se serran girot. 

Öcalan nika pêrokîn rojdemê dinya de nameyo ke tewr vêşî yeno qiseykerdin o. Emerîqa, Îngilîstan, Fransa ya ke bi serrano herbê mavêna Kurdan û Tirkan kenê har zî mecbûr mendî na raştî qebûl bikerê. Pêrokîn qûwetê serdest yê ke heta nika ‘Öcalan’î zey ‘terorîst’ bi name kerdî nika zey Rayver qebûl kenê. 

Rayver Öcalan’î miyanokê Newroz zî vurna. 

Nika Newroz bi nameyê çarekerdin. Endî mîladê raştî yê Kurdan bi Newroz destpa keno. Xo ra veriya coy zî wina bi. Kawa yê esinkar zî verniya zilmê zaliman vejya û adirê newroz fiştra ci. 

Mazlûm Doğan’î zî bi feda kerdişê ganê xo verniya îşkence, zorvajî û zilmê dişmenan Newroz bimbarek kerd. Û pey coy Zekîye, Ronahî û Berîvanan...  

Ewro Newroz o. Asîmanî tîj danê, dar û daristanî jîl danê. Gul û Gulistanî serre yê xo açarnenê rojî. Pêrokîn goşî û çimî açarniyayê Îmrali. Çi ke bi mesajê Rayver Öcalan’î nê hardan de kêberê do newî abiyeno. Wextê wa û bira biyayişê şaran destpa keno. Wextê sîstemê demokratîk û serbest yê şaran destpa keno. Endî wextê hikumdarî û kiştiş, împaratorî û koledarî, zext û zorvajî qedîyeno. Endî serva AKP û dewletanê serdest zengê taloke çingnenê. La nê pêrokîn çî xo bi xo, ya zî tenya bi hewldayinê Rayver Öcalan’î nêbenê. Gune pêrokîn şarî zî tewrê na merhale bibê û vengê xo berz bikerê. Haştî û çarekerdin encex wina roniyena...

Ewro Newroz o. Ma rê roşano. Serbestî û weşî yo. Newroz’a şima bimbarek bo...