Neynika dadgeha Tirkîya: Cînayetê Dînkî

Mudirê Weşanê Pêroyî yê Rojnameyê Agosî Hrant Dînk 10 serrî verê amebî qetilkerdiş û serrgêra 10. yê qetilkerdişê ci de hîna zî qatilê ci nêameyî dîyayîş.

Hrant Dînko ke verê cû bi vatişanê ‘ermenîyo ke dişmenê tirkan o’ bîbî hedef û 19ê Çileyê 2007 de hetê keso ke sereyê ci de kumekê sipî estbî, amebî qetilkerdiş. Dima ra vejîya orte ke yê ke ci kişto Ogun Samast o. Dîmenan de amebî dîyayîş ke Ogun Samast aye roje tena nêbîyo. Wextê mehkemekerdişî de amebî dîyayîş ke qeydê kamerayan hetê polîsan ra ameyo pakkerdiş. Her çiqas ke Erhan Tuncel û Coşkun Îgcîyî selahîyetdaran xeberdar kerdbîy zî amebî dîyayîş ke ti tedbîrî nêameybî girewtiş. No qetilkerdiş, qetilbîyayîşê Talat Paşa ke koçê ermenîyan de berpirsîyar bî, mendêne.”

Ti tedbîrî nêameybî girewtiş

Her çiqas ke hetê Mudirîya Asayîşî ya Trabzon û Stenbolî ra ameyêne zanayîş ke do Dînk bêro qetilkerdiş zî ti tedbîrî nêameybî girewtiş û heta qetilkerdişî ra dima nînan belgeyanê cînayetî bi hawayo kêmî erşawitbî û tayînan zî bedilnaybî. Xora amebî dîyayîş ke Mudirîya Asayîşî ya Stenbolî de raporo sexte amebî amadekerdiş. Nîsana 2007 de derheqê Ogun Samast, Erhan Tuncel û Yasîn Hayal zî tede 18 kesan rê doze abîbî û Samastî rê ‘bi plankerdiş merdim kiştiş’ ra 22 serrî û 10 aşmî ceza amebî dayîş. Netîceyê 25 roniştişanê doze de heme kesî endamîya rêxistine ra beraat kerdbî. Yê ke qetilkerdişî de engişta înan estbî, heme ameyî terfîkerdiş. 

AÎHMî Tirkîya mehkûm kerd

14ê êlule de Mehkemeya Heqê Merdiman ya Ewropaye (AÎHM) netîceyê doze aşkere kerde û cînayet ver Tirkîya mehkum kerde. AÎHMî qerar da ke Tirkîya 113 hezar euro tazmînat bido keyeyê Dînkî. Bi no hawa dosya newe ra abîye û rayîrê mehkemebîyayîşê kesê ke îxmalê înan cînayet de estbî, abî. 

Leşkerî zî ewja de bî

Çarçeweya tehqîqatî de amebî dîyayîş ke wexto ke Dînk ameyo qetilkerdiş, cayê hedîseyî de cendirmeyî zî estbîyî. Labelê dozger Gokalp Kokçuyî derheqê cendirmeyan de îdîaname amade nêkerdbî. Teşebusê derbe ra dima eynî dozger çarçeweya tehqîqatî de 20 kesê ke leşkerî zî tede estbî, da tepiştiş. Dima ra eynî çarçewa de zaf hûmarî de leşker û fermandarî ameybî tepiştiş û nînan ra tayê ameybî tewqîfkerdiş. Heta nika îfadedayîşî ra zêde doze de ti averşîyayîş çin o. Rojê ewilî yê cînayetî de qatilî mîyanê rêxistina Ergenekonî de ameyêne gêrayîş, nika zî mîyanê cematê Gulenî de yenî gêrayîş.