Xebera xelesnayişê Navendê Minbic badê 73 rojan, 12ê Tebax seat 17:05î de amê. Quwetanê Meclîsê Lejkerî yê Minbic ser waştena şarê Minbic, 1ê Hezîran de destpa hemleya xelesnayişê Minbic kerdî. Operasyono ke heremanê Tişrîn û Qaraqozax ra 4 cepheyan ra destpa kerd roja 73. de resya serkewtiş û Minbic de peynîya hikmê DAIŞ ame. dayen. Lejwanê ke operasyonê xelesnayişî de ca girotî û derheqê na serkewtişî de ANF rê qisey kerdî vatî ‘ma zilmê DAIŞ şikit û sûka xo xelesna.
Dagirkerîya DAIŞ qedîya
Lejwanê Meclîsê Lejkerî yê Minbic Ebû Elî hayr ant êrişanê çeteyanê DAIŞ ser û aşkere kerd ke wextê ramitişê operasyonî de çeteyan bi wesayîtanê bombebarkerdî, bi mayîn û sûîkastan êriş kerdo. Ebû Elî vist vîrî ke înan nê pêrokîş êrişanê DAIŞ peyser pisiknay û sûk de peynîya dagirkerîya DAIŞ erdê. Ebû Elî da zonayen ke badê îşgalê çeteyan yê Minbic o bi xo sûk ra vejîyayo û peycoy operasyonê xelesnayişê Minbicî de ca giroto. Lejwanê meclîsî aşkere kerd ke çeteyanê DAIŞ bin nameyê îslamîyetî de ser şarî de zilm û zorvajî ferz kerdo û da zonayen ke cenî bi zorî çeteyan ra zewijnay.
Hesabê zilmê DAIŞ pers kenime
Ebû Elî vist vîrî ke o bin banê Meclîsê Lejkerî yê Minbic de ca gêno û hesabê zilm û dejê ke çeteyan şarî rê ferz kerdî perseno. Ebû Elî da zonayen ke o jû taxa feqîr yê Minbic de ameyo dinya, heta îşgalê DAIŞ sûk de mendo û bado ke çeteyî kewtî sûk ewja ra vejyayo. Ebû Elî vist vîrî ke çeteyanê DAIŞ 7 ferdê malbata ci înfaz kerdê û aşkere kerd ke ê mijdanîya xelesnayiş û serkewtişî danê şarê Minbicî û nayî ra zaf şa û kêfweş ê.
Tarîxê Minbic bi gonî ame nuşten
Lejwanê Meclîsê Lejkerî yê Minbic Ebû Elî veng da gencanê Ereb ke bin banê Meclîsê Lejkerî yê Minbicî de ca bigîrê û serva ronayişê Sûrîyeya azad û demokratîk tekoşîn bikerê. Lejwanê bîn yê Meclîsê Lejkerî yê Minbin Faysal Yaser zî rîwalê xelesnayişê Minbic kêfweşîya xo ard ser zon û hayr ant xelesnayişê sûkî de rolê şehîdan ser. Yaser vist vîrî ke tarîxê Minbic bi gonî ameyo nusnayen û va yê ke no tarîxî bi gonî nuştî ganî nîrê vîrakerden. Faysal Yaserî aşkere kerd ke ê bîyê cewabê waştenanê azadî, edalet, têdûştî yê şarê Minbic. Yaserî peynîyê qiseyanê xo de veng da Minbicijan ke Minbica azad û Sûrîyeya demokratîk înşa bikerê.
Heto bîn ra vizêr seatanê şan de Meclîsê Lejkerî yê Bab bi damûstayîneke ame ronayen.
ANF/MINBIC