YAŞAR AKSU / ANF / MÊRDîN


Rayberê Şarê Kurd Abdullah Ocalan binê tecrîdêko giran de yo û nizdîyê 2 serrî yo ke tira ti xebere nîna girewtiş û tayê xeberî derheqê Ocalanî de ser medyaya komelkî de ameybî parekerdiş. 

Kurdî zî seba ke Rayberê xo ra xeberêk bigîrî, seba weşî, ewleyî û azadîya Ocalanî çalakîyan virazenî û na çarçewa de Kurdistan, Ewropa û zaf cayanê dinya de çalakîyî yenî viraştiş. Bitaybetî vakurê Kurdistanî de çalakîyî grevê vêşanîye dîyayî destpêkerdiş. 

Nê çalakîyan ra yewe zî hetê nisêbînijan ra yena viraştiş. Nisêbînijê ke seba werdarnayîşê tecrîdî kewtbî grevê vêşanîye, babete ser o qisey kerdî. Nezîr Saraçî dîyar kerd ke o tecrîdî teberê merdimîye de vîneno û wina va: “Seba ke ez tecrîdî şermizar bikera, kewta grevê vêşanîye. No tecrîd tena Rayberîye rê nê heme şaran rê yeno kerdiş. Girêdayeyê ma bi Rayberîye û felsefeya ci do qet nêqedîyo.”


Heta ke tecrîd biqedîyo ma do bidomnî

Nisêbînijan ra Mehmet Zekî Demîrî zî da zanayîş ke ê seba ke tecrîd bêro wedarnayîş kewtî grevê vêşanîye û wina domna: “Heta ke Rayberîye azade beno, ma do çalakîyanê xo yê demokratîkan bidomnî. Wa herkes bizano ke ancax bi wedarnayîşê tecrîdî aştîye yena. Cok ra wa herkes vengê xo berz bikero.”

Nezîr Ozbeyî zî va ‘tecrîd sucê merdimîye yo’ û wina dewam kerd: “18 serrî ra zêde yo ke ser Rayberîye de tecrîdêk yeno bicaardiş û seba wedarnayîşê tecrîdî ganî waştişê keye yan zî avûkatan bêro qebulkerdiş. Neke do welat de krîzo sîyasî bidomîyo. Ma do çalakîyanê xo heme cayê welatî de bidomnî. Çimkî no şar hesretîya aştî û demokrasî mendo.”


Ma do tecrîdî qebul nêkerî

Welatîyan ra Hamît Tokayî zî wina va: “Rayberîye bi serran o ke keye û avûkatanê xo reyde pêvînayîş nêkeno. Heyetê Îmrali zî yeno astengkerdiş. Heta ke tecrîd wedarîyo, ma do çalakîyanê xo bidomnî. Azadîya Ocalanî azadîya heme şaran a.”

Tewr peynî Şerîf Barişî zî va ‘seba wedarnayîşê tecrîdî tena grev nê, ma do heme çî bikerî’ û wina dewam kerd: “Sey nisêbînijo ke bîya şahidê dejan, ez wazena ke wa êdî şarê Tirkîya û Kurdistanî dej nêancî û wa aştî, demokrasî û azadîye bêro nê erdan. Rayîrê nêyî zî ancax bi wedarnayîşê tecrîdî beno. Neke no adir heme cayan de do berz bibo.”