Amed û Stenbol ra dima Nobeta Edalet û Wijdanî yê HDP dewrê Wan bî. Nobet ewro Parka Aştî yê Mûsa Anterî de destpê kena.
Wekîlê HDP ke dê tewrê çalakî bibê, dîyar kerdî ke iyê dê vera zilmo ke ser 80 milyon kesan de yeno ramiten nobet de yî û vengê tewrbîyayîşî day.
Çalakîya Nobeta Edalet û Wijdanî yê HDP ke 25'ê Temmuze de Amed de start girot û 1'ê Tebaxe de Stenbol de dewam kerd, ewro (8ê Tebaxe) hetê Wandewr yena girewten. Nobet ewro qiseyanê kombîyayîşê Koma Partî yê Hemseroka Pêroyî yê HDP Serpîl Kemalbay destpê keno.
Wekîlanê HDP Osman Baydemîr, Nadîr Yildirim, Lezgîn Botan, Bedîa Ozgokçe, Alî Atalan, Adem Geverî, Kadrî Yildirim, Nîhat Akdogan, Meral Daniş Beştaş, Mehmet Emîn Adiyaman, Mehmet Alî Aslan û Dîlek Ocalan dê tewrê çalakî bibê. Tîya de zî nobet do hefteyêk dewam bikero.
HDP şarî ra, şar HDP ra quwet gêno
Vizêr derheqê çalakî de banê HDP yê Wan de kombîyayîşê çapemenî virazîya. Parlamenterê HDP yê Wanî Lezgîn Botan ke kombîyayîş de qisey kerd, vist vîrî ke derbeya esasî 20’ê Temmuze de îlankerdişê OHALî yo. Botanî aşkere kerd ke HDP vera polîtîkayanê îqtîdarî yê antîdemokratîk de têkoşîn kena û va, ‘Rixmo ke nobet manî kerdî zî çalakî raştê eleqeyêka gird amê. Partîya ma quwetê xo şarî ra û şar zî quwetê xo partîya ma ra gêna.
Parka Mûsa Anterî de
Botanî ard ziwan ke Nobeta Edalet û Wijdanî (ewro) saet 12.30 de Parka Aştî yê Mûsa Anterî de destpê bikero û wina va: “Kombîyayîşê Kome yê Partîya ma do park de virazîyo. Îdarekarê ma, temsîlkarê sazîyanê ma, pawitoxê heqê mordeman û şarê ma do tewr bibê. Şarê ma do saet 11.00 de heyetê HDP pêşwazey bikerê. Ganî hemî kesê ke wîcdan, edalet û demokrasî wazenê desteg bidê nobet. Nobet seba 80 milyon kesê ke raştê zilm û nêheqîyan yenê ya.
115 serran o dewleta zordar serdest a
Parlamenterê HDP Mehmet Alî Aslanî zî vist vîrî ke kesê ke ameyê weçînayen esîr ameyê girewtiş û aşkere kerd ke zey HDP înan seba 80 mîlyon însanê ke Tirkîya de raştê zilmî yenê nobet day destpêkerdiş. Aslanî da zanayîş ke 115 serran o dewletTa zordar serdest a û wina va: “Na nobet destpêk a. Ma dê saet 11.00 de bi heyeta xo nobet pêşwazî bikerê û tewrê nobeta Parka Mûsa Anterî bibê.”
DÎHABER/WAN